Valter Mazarri nuk do jetë në pankinë në ndeshjen kundër Çelsit, pasi është i pezulluar (mori karton të kuq kundër Vilarealit), por ai mundohet të parashikojë gjithçka, nga atmosfera, tek ecuria e ndeshjes. Trajneri i Napolit u bënë “presion” anglezëve me tifozerinë e zjarrtë të skuadrës, por edhe me motivimin e lojtarëve të tij.
Favoritë “Kam dëgjuar të flitet se ne jemi favoritë dhe më duket pak e çuditshme. Gjithsesi, ne nuk u kushtojmë shumë rëndësi këtyre elementëve pasi e njohim forcën e Çelsit. Ata janë një ekip i mbushur me futbollistë cilësorë, të aftë për të zgjidhur një ndeshje. Për mua është si një ndeshje derbi”, tha tekniku i Napolit.
Atmosfera “Kundërshtarin do e presim në një stadium të zjarrtë, me 60 mijë tifozë që do na mbështesin që nga minuta e parë deri në të fundit. Është normale që kjo të jetë një armë më shumë për ne, por mbi të gjitha duhet të ruajmë përqendrimin në fushë. Do jetë një ndeshje, ku detajet mund të ndikojnë në rezultat. Por, më duhet të pranoj gjithashtu se lojtarët janë të motivuar në maksimum”.
Taktika “Anglezët janë një ekip që kohët e fundit e kanë ndryshuar skemën. Disa herë kanë luajtur 4-3-3 dhe disa herë 4-4-2. Unë kam kohë që punoj me ekipin dhe jemi gati për t’i përballuar sido që të zbresin në fushë. Në varësi të modulit të tyre, do të jetë edhe loja jonë”, shtoi ai.
Mungesa “Më vjen keq që nuk do të jem në pankinë, por këtë e them për shkak të emocioneve që do të përjetoja duke qenë pranë fushës. Nuk jam aspak i shqetësuar për lojën, pasi zëvendësi im Frustalupi është më i aftë se unë për të lexuar taktikisht një ndeshje. Ka për të bërë zgjedhjet e duhura. Unë kam për ta shijuar fitoren si një ultras”, u shpreh Valter Mazarri.
Kriza “Çelsi është në krizë? E kush e thotë këtë?! Nëse ata nuk kryesojnë renditjen në kampionat, nuk nënkupton se kanë probleme në Champions. Madje, vetëm në Ligën e Kampioneve që nuk probleme, pasi deri tani janë paraqitur shumë mirë. Duke qenë se ky është objektivi i tyre kryesor për këtë sezon, do e bëjë ndeshjen akoma më të vështirë për ne. I kam këshilluar futbollistët që të jenë të përqendruar deri në sekondën e fundit, pasi ekipet angleze luftojnë derisa arbitri ta mbyllë takimin. Jam optimist”, përfundoi deklaratën e tij kreu i pankinës së skuadrës italiane.

---