Pak ditë më parë, tifozët e Argjentinës kanë festuar 35- vjetorin e ndeshjes historike kundër Venezuelës, e vlefshme për kualifikueset e Botërorit në vitin 1986. Ndeshja u mbyll me rezultatin 3-2 për Argjentinën me dopietën e Maradonës dhe golin e Pasarelës. Një fitore e jashtëzakonshme që hapi portat e kualifikimit dhe më pas Argjentina fitoi kompeticionin e rëndësishëm botëror falë paraqitjeve spektakolare të Maradonës.
Në profilin e tij të “Instagram”-it, Maradona kujton atë moment dhe thumbon Lionel Mesin. “Sot është përvjetori i 35-të i asaj ndeshjeje me eliminim direkt kundër Venezuelës në vitin 1985. Kisha luajtur dy miqësore më parë kundër Paraguait dhe Kilit. Por ishte ndeshja ime e parë zyrtare pas Botërorit të vitit 1982.
Në tri vite mungesë kam pasur shumë probleme, një kavilje të thyer dhe telashe të tjera që kishim ne për të luajtur me kombëtaren. Përpara nuk kishte data të FIFA-s dhe klubet mbanin pasaportat dhe federatat s’kishin mundësi që t’i kërkonin. Ai ishte një tjetër futboll, ishte një botë tjetër.
Kur shkuam në Venezuelë, një person më goditi gjurin kur po futeshim në hotel. Më parë nuk kishte rregullore “Fair Play”, të godisnin me shqelma. Atë ndeshje nuk do ta harroj më kurrë dhe nuk e hoqa më fanellën e Argjentinës. Mos u thoni budallallëqe njerëzve. Unë do të jem përgjithmonë numri 10 i kombëtares”, ka thënë Maradona.