Shumë shpesh në ndeshjet ku për ballen kandidatet për titull, flitet më tepër përpara sesa pasi ato të jenë luajtur. Çdo fjalë e trajnerëve analizohet me lupë. As Liverpul-Mançester Siti nuk i shpëton këtij statusi. Ajo është ndeshja më e rëndësishme e momentit në Angli. 

Kryesimi i “Reds”-ave +6 do të thotë se ata nuk janë të dënuar të fitojnë, ndërsa Siti e ka të detyrueshme që ta shmangë humbjen. Por, jemi vetëm në nëntor dhe asgjë nuk vendoset tani.

STATISTIKAT – Liverpuli ka 16 ndeshje radhazi në kampionat që nuk mposhtet nga Siti në “Anfield”. Disfata e tyre e vetme në shtëpi në 28 përballjet e fundit ka qenë në maj 2003. 16 ndeshjet pa fituar në Liverpul janë seria më e gjatë e një ekipi të Premier Ligës që dështon të mposhtë rivalin e saj në shtëpi (5 barazime, 11 humbje).

Megjithatë, “Qytetarët” kanë humbur vetëm një nga 5 përballjet e fundit në Premier Ligë: 2 fitore, 2 barazime. Ata mund të fitojnë dy ndeshje radhazi në kampionat kundër “Reds”-ave për herë të parë që prej 4 fitoreve që arritën nga 1935-’37.

LIVERPULI – Një fitore e Liverpulit do të barazonte rekordin e startit më të mirë të tyre në kampionat me 11 fitore dhe 1 barazim në 12 javë. Një rezultat të tillë e kanë arritur vetëm 5 ekipe deri më sot, përfshirë Liverpulin në 1990 dhe Sitin dy herë. Skuadra e Klopit nuk mposhtet prej 28 ndeshjesh radhazi në Premier Ligë, duke fituar 19 nga 20 të fundit. Humbja e tyre e vetme në 50 ndeshje në kampionat ka ardhur pikërisht kundër Sitit në janar. Në shtëpi ata kanë gjithashtu 45 ndeshje që nuk mposhten.

SITI – Kampionët e Guardiolës i kanë fituar 11 nga 12 transfertat e tyre të fundit në Premier Ligë, duke shënuar 30 gola. Ata janë ekipi që ka shënuar më shumë gola këtë sezon, 34, dhe kanë dështuar ta gjejnë rrugën e rrjetës vetëm në 1 rast në 33 ndeshjet e fundit në kampionat.

“Qytetarët” kanë humbur 2 nga 11 javët e para këtë sezon. Asnjë skuadër e drejtuar nga Guardiola nuk ka pësuar 3 humbje përpara javës së 15-të të kampionatit. Rahim Sterling pritet të regjistrojë ndeshjen e tij të 200-të si titullar në Premier Ligë, 77 prej të cilave i ka me fanellën e Liverpulit. Guardiola ka humbur 7 nga 17 duelet e tij kundër Klopit në karrierë, më shumë sesa ndaj çdo rivali tjetër.

Përgatiti: ANDROKLI DRALO

NDIQE LIVE "PANORAMA TV"

---