Lista e Shpresës, zbulon një tjetër afrim të Laçit
Trajneri Alban Bushi ka zbuluar dje listën e lojtarëve që ka grumbulluar në zborin e radhës në Antalia, për kombëtaren U-20, ose siç quhet ndryshe, Shpresa B. Lojtarët e grumbulluar do të kenë mundësi të tregojnë vlerat me kuqezinjtë në dy ndeshje miqësore. Por, publikimi i kësaj liste ka zbuluar edhe një tjetër përforcim zyrtar të Laçit në merkaton e janarit.
Sulmuesi pogradecar Erjon Dragoj figuron te lista e lojtarëve të grumbulluar si kontingjent i ardhur nga skuadra kurbinase. Sulmuesi 18-vjeçar ka spikatur te Pogradeci dhe mesa duket, kjo ka bërë që drejtuesit e Laçit të tregohen të shpejtë duke e bërë pjesë të tyre sulmuesin.
Tani pritet që Dragoj të evidentohet te Laçi, një skuadër që u jep prioritet të rinjve, gjë e cila duket edhe te lista e lojtarëve të grumbulluar nga Kombëtarja U-20. Përveç përforcimit më të ri, Erjon Dragoj, Laçi përfaqësohet në këtë grumbullim edhe me një lojtar tjetër, mesfushorin Erisildo Smaçi.
Sulmuesi pogradecar është aktivizuar me laçianët në dy miqësoret e fundit, ndaj Dinamos dhe Kastriotit, kështu që ai shihet një alternativë më shumë për trajnerin Mezani.
NDIQE LIVE "PANORAMA TV"