Liga Unike e basket bollit për meshkuj ka mësuar mbrëmjen e djeshme dy skuadrat e tjera gjysmëfinaliste. Teuta dhe Prizreni kanë kaluar me sukses “play off”-in, duke iu bashkuar Yllit dhe Pejës në “Final 4”.

TIRANA-TEUTA – Pasi kishin fituar takimin e parë në shtëpi, durrsakët e kompletuan punën dje në kryeqytet, teksa dolën me triumf edhe nga salla “Farie Hoti”. Teuta regjistroi një sukses në shifrat 73-78 (12-23, 15-17, 19-18, 27-20), duke prerë biletën për në fazën finale të kompeticionit mbarëkombëtar.

Me pesë lojtarë të huaj në përbërje dhe me më shumë zgjedhje në pankinë, bregdetarët nuk e patën shumë të vështirë për ta siguruar kualifikimin. Ndërsa Tirana duket se vuan pasojat e largimeve të papritura të dy amerikanëve, kryesisht të Clark, i cili kishte treguar një nivel shumë të mirë.

Madje, trajneri Erkand Karaj nuk pati në dispozicion as shërbimet e Julian Hamatit, duke u paraqitur në këtë takim të rëndësishëm me një formacion shumë të cunguar.

Për sa i përket ndeshjes, Teuta ishte superiore në pjesën e parë, duke shkuar në pushim me +13 pikë, për ta rritur epërsinë deri në +18 pikë në periodën e tretë. Më pas bardheblutë provuan të reagonin, duke ngushtuar deri në 5 pikë në fund.

Për sa u përket paraqitjeve individuale, i gjithë formacioni i miqve preku dopioshifër pikësh, ku mbi të tjerët spikatën Core dhe Peterson me nga 19 secili. Te Tirana shënuesi më i mirë ishte Hysa, autor i 19 pikëve, ndërsa Hysenagolli vazhdon të regjistrojë statistika të rëndësishme.

Gjiganti i bardhebluve është “i abonuar” me dopietat dyshifrore dhe këtë herë koleksionoi 16 pikë dhe 11 kërcime. Në gjysmëfinale Teuta do të ketë përballë kampionët në fuqi, Golden Eagle Yllin.

PRIZRENI-RAHOVECI – Në derbin mes skuadrave kosovare, ishte Rahoveci që doli fitimtar, teksa mposhti në transfertë Prizrenin me rezultatin minimal 86-87 (27-26, 22- 15, 13-21, 24-25). Por kualifikimi shkoi për Prizrenin që kishte triumfuar në ndeshjen e parë me +5 pikë epërsi (93- 98).

Ndeshja e djeshme ishte e luftuar deri në sekondat e fundit, por vendësit arritën që ta menaxhonin avantazhin e sfidës së parë dhe tashmë do të gjejnë në gjysmëfinale Pejën.

Te Prizreni shkëlqyen Mccoy me 21 pikë, Cannefax me 21 e 10 asistime dhe Hajdari me 24 pikë. Te Rahoveci më të mirët ishin Rugova me 24 pikë dhe Dunans me 19 pikë, 9 kërcime dhe 7 asistime. Për sa i përket fazës “Final 4”, ajo do të mbahet në datat 21-22 prill, ndërsa mbetet për t’u përcaktuar vendi organizator.

 

PANORAMASPORT.AL

NDIQE LIVE "PANORAMA TV"

---