Licencimi për kupat e Europës, ja 5 kriteret që duhet të plotësojnë klubet e Superiores
Nis numërimi mbrapsht për klubet e Kategorisë Superiore. FSHF ka njoftuar se ka filluar procesi i licencimit për kompeticionet e UEFA-s për sezonin e ardhshëm 2020-2021. Sipas sektorit të licencimit në FSHF, ky proces do të përfundojë më 31 mars 2020, sipas afateve të vendosura nga UEFA.
“Gjatë kësaj periudhe klubet aplikante për licencë duhet të paraqesin në sektorin e licencimit në FSHF të gjithë dokumentacionin e kërkuar për të përmbushur pesë kriteret që kërkohen për të përmbyllur këtë proces. Duke filluar me kriterin sportiv, atë infrastrukturor, administrativ, ligjor dhe kriterin financiar, i cili është edhe kriteri me peshë specifike dhe rëndësinë më të madhe në raport me kriteret e tjera”, thuhet në njoftimin e FSHF-së.
Ndërkohë, më 12 dhjetor do të organizohet edhe një seminar për këtë çështje, ku FSHF do të ftojë të gjithë përfaqësuesit e klubeve të Superiores. Kujtojmë që në vitin e kaluar nuk u licencuan klube si Tirana, Flamurtari dhe Luftëtari, të cilat nuk plotësonin kushtet për të luajtur në Kupat e Europës, gjithnjë nëse do të kualifikoheshin.
/PANORAMASPORT.AL/
NDIQE LIVE "PANORAMA TV"