Largohet Shkullaku, Lushnja zhvendoset në Çermë për stërvitje
Trajneri i Lushnjës, Hysen Dedja, ka qenë shumë i angazhuar për të zgjidhur problemin e stërvitjes së skuadrës. Tekniku i lushnjarëve ka parë nga afër një fushë futbolli 12 kilometra në veriperëndim të Lushnjës dhe ka mbetur i kënaqur.
“Pashë një fushë futbolli në një gjendje shumë të mirë për stërvitje. Edhe distanca nga Lushnja nuk është e madhe. Mendon se i bën mirë skuadrës që të stërvitemi aty”, është shprehur trajneri Dedja.
Kështu, Bashkia e Lushnjës duhet të sigurojë udhëtimin e skuadrës, ndërsa Bashkia e Divjakës të ofrojë ambientin. Bëhet fjalë për fushën e futbollit që ndodhet në Çermë-Proshkë, të njësisë administrative Tërbuf, në Bashkinë e Divjakës.
Tekniku verdhejeshil foli për ndryshimet që priten në prag të ndeshjes me Teutën. “Kam larguar nga ekipi Hermes Shkullaku. Ky futbollist nuk do të jetë pjesë e Lushnjës për pjesën e dytë të sezonit. Kemi synim të marrim në ekip rusin Khatskov dhe sulmuesin Përgjini. Synojmë edhe vlonjatin Zeqaj të Luftëtarit”, deklaroi trajneri Dedja.
Kështu, Shkullaku, i cili nuk luan te Lushnja, pritet të shkëputet edhe zyrtarisht nga klubi. Ndërkohë, trajneri Dedja ka biseduar edhe me mesfushorin lushnjar Armando Mezini, i cili është vetafruar, pasi deklaroi se është larguar nga Pogradeci. Lushnjarët kanë nisur përgatitjet për ndeshjen me Teutën.
Trajneri Dedja tha se skuadra verdhejeshile shkon për pikë në Durrës. “Kemi bërë një përgatitje shumë të mirë dhe kemi një situatë shumë optimiste. Pres kurimin e plotë të Sefës dhe bashkë me çunat e kemi të qartë se në Durrës do të shkojmë për rezultatin pozitiv”, tha trajneri Dedja katër ditë para transfertës së Durrësit, ku nis edhe pjesa e dytë e sezonit.
Alban Alushi
NDIQE LIVE "PANORAMA TV"