Laçi me fat në Ligën e Konferencës, ekipet shqiptare kualifikohen gjithnjë përballë fqinjëve nga Mali i Zi
Laçi-Iskra Danilovgrad do të jetë përballja e pestë në arenën europiane mes klubeve shqiptare dhe fqinjëve nga Mali i Zi. Skuadrat malazeze gjithnjë kanë rezultuar fatsjellëse për klubet shqiptare, pasi kanë arritur që të kualifikohen duke vijuar në raundet pasardhëse.
Tri janë përballjet e shkuara, që të gjitha në turet paraeliminatore në Ligën e Europës, ku dy janë për Kukësin dhe një për Flamurtarin. Në sezonin 2011-2012 Flamurtari, në turin e parë të Ligës së Europës u përball me Buduçnostin.
Vlonjatët e fituan takimin e parë në shifrat 3-1 dhe u mundën në të dytin 2-1, por u kualifikuan. Më pas, në edicionin 2015-2016, Kukësi kualifikohet ndaj Mladost Podgoricës, me një humbje 1-0 dhe me një fitore 4- 2.
Një vit më vonë verilindorët përballen me malazezët e Rudar Pjevlje, të cilët i eliminojnë me një barazim 1-1 dhe një fitore 1-0.
Ndërsa në Ligën e Konferencës, vjet Laçi eliminoi Podgoricën, ku në ndeshjen e parë u mund 1-0 në transfertë dhe në kthim fituan 3-0, pas shtesave dy herë nga 15 minuta.
Tani është radha që Laçi të vijojë traditën e mirë me malazezët, ku përballë do të kenë Iskra Danilovgrad.
PANORAMASPORT.AL
NDIQE LIVE "PANORAMA TV"