Kriza e Vllaznisë, një poezi epike nga tifozi shkodran
Tifozët shkodranë janë duke e vuajtur krizën e rezultateve që skuadra e tyre po kalon në këto javë të para të kampionatit. Edhe pse në merkato u afruan lojtarë cilësorë si Hasani, Lika, Vucaj, Orelesi etj, kuqeblutë kanë arritur të sigurojnë vetëm 5 pikë në 6 takime.
Një tifoz shkodran e ka shprehur në vargje trishtimin e tij, në këtë moment krize që Vllaznia po kalon. Poezia e tij, e dërguar në inbox-in e “Panorama Sport” titullohet “Vllaznisë time”.
Vllaznisë time!
Vjet shpëtove për një fije,
në finish kur ishte gara,
thashë do kthehesh si të ka hijen,
sivjet më duket të ka ardh radha.
Jooo larg qoftë, m’u thaftë goja,
se me mbet pa ty Vllazni,
pa dyshim që Superiorja,
do të vishej krejt në zi.
Jeni zhyt në fund të tabelës,
rrezik me ra prej kategorisë,
kush si ban hizmet fanellës,
shpejt, t’largohet prej Vllaznis.
Shkodra është djepi i futbollit,
aty lindi kjo lojë magjike.
plot talente i dhuroj kombit,
që u mburrëm gjithë këto vite.
Peshe të rëndë ka kjo fanellë,
s’e mbani dot, unë e kuptoj,
halli juaj thellë-thellë
është për lekë e jo për lojë.
Ne ju ndjekim kudo jeni,
me radio, televizor e në stadium.
S’keni turp, sedër s’keni,
s’u bahet vonë gjithmonë me humb?
Janë ngritur përroskat e ul kodrat
thoshte dikur një vajtore,
ra të mëdhajat, ngritur të voglat
se me “finte” , s’më kuptove.
S’po vë n’dyshim politikën
ndonse ju po dredhni bisht,
shpesh herë asaj, ja kam frikën
thua, dhe ajo ka gisht?!
Hapni krahun, mjaft duruam!
Mos e zgjasni më mirë sot.
Kemi të rinjtë që vjet fituan.
Shkodra ka talente plot.
Nga Agustin Alia
NDIQE LIVE "PANORAMA TV"