Në çdo rrethanë tjetër, Duka sot do të duhet të ishte nën një presion të madh, por për inerci, rastësi apo për kalkulime të mirëmenduara, inaugurimi i stadiumit të ri kombëtar e zhvendosi të gjithë vëmendjen te ky i fundit. Mirëpo, Duka sot ka përgjegjësi, si njeriu që zgjedh trajnerët dhe si njeriu që ka peshë direkte për strategjinë e ekipit kombëtar. Po të shikosh rezultatet e ekipeve kombëtare, janë pothuajse katastrofike. 

Përtej kësaj, le të kthehemi te çështja e trajnerit të Kombëtares. Në qoftë se Duka pati meritën që mori De Biazin, i besoi atij dhe Kombëtarja shkoi atje ku shkoi, duke shkruar një rezultat historik, ai njëherësh ka përgjegjësi edhe për situatën ku ndodhemi sot. Gabimi i parë, koha e tregoi, ishte që mori Panuçin. I dyti për të, që e shkarkoi me vonesë duke mos e lexuar në kohë situatën dhe e çoi të gjithë edicionin dëm.

Kësisoj, zgjedhja për Rejan kërkon llogari të zgjatura në kohë. Nëse Reja ka dhënë garancitë e duhura për atë që ka objektiv Kombëtarja, atëherë plani i vijimësisë kërkon hapa të mëtejshëm në ecurinë e Kombëtares, për t’u konsideruar zgjedhje pozitive dhe e goditur.

Po në të kundërt, në rast se me Rejan nuk shkohet deri te firma e një kontrate pasuese? Atëherë rezulton që Shqipëria të ketë çuar dy edicione dëm. Atë që sapo iku dhe një tjetër, i nevojshëm për një trajner që të njohë ekipin dhe eksperimentojë. A e ka luksin Shqipëria të hedhë në erë kaq shumë edicione?

PANORAMASPORT.AL

NDIQE LIVE "PANORAMA TV"

---