Laçit nuk i ndahet tersi i dëmtimeve për krahun e djathtë të mbrojtjes. Para mbylljes së sezonit 2019-2020, ishte Abdurrahman Fangaj ai që u dëmtua rëndë në një ndeshje ndaj Bylisit dhe më pas iu nënshtrua operacionit në gju, që do ta lërë edhe për disa muaj jashtë fushave.

Në mungesë të Fangajt, trajneri Armando Cungu aktivizoi Albion Markun në krahun e djathtë në ndeshjen e turit të parë të Ligës së Europës ndaj Keshlës. Paraqitja e 19-vjeçarit ishte fantastike dhe kjo i mundësoi edhe një thirrje në Kombëtaren U-21 për ndeshjet ndaj Austrisë dhe Andorrës.

Në të dyja takimet Marku luajti nga minuta e parë, por të martën në “Elbasan Arena” ai doli nga fusha para kohe. Në minutën e 68-të lojtari e kishte të pamundur të vazhdonte ndeshjen për shkak të një dëmtimi.

Menjëherë stafi mjekësor i Kombëtares Shpresa i erdhi në ndihmë Markut, por, me sa duket, dëmtimi është serioz në këmbën e majtë. Gjithsesi, nuk ka asgjë të sigurt për momentin nëse kjo mund ta penalizojë futbollistin për ndeshjen e 17 shtatorit ndaj Hapoel Ber Shevës. Në rast se Marku nuk ia del, atëherë trajneri Cungu me siguri do të provojë titullar Dorian Kërçikun në krahun e djathtë.

Ndërkohë, Laçi kishte me Shpresat edhe Adolf Selmanin dhe Redon Xhixhën, që mbajtën një peshë kryesore në sukseset e kuqezinjve.

GJYQTARËT – Më 17 shtator, ora 19:00, në stadiumin “Elbasan Arena”, Laçi do të presë Hapoel Ber Shevën. Kjo ndeshje i është besuar për t’u gjykuar një tresheje nga Holanda. UEFA ka përcaktuar si kryesor Jokem Kamfuis, ndërsa asistentë Johan Balder dhe Bas Van Dongen.

NDIQE LIVE "PANORAMA TV"

---