Klubi i Kategorisë së Parë merkato në Poloni, pranë firmos me futbollistin japonez
Merkatoja e klubit cërrikas po evulon shumë këto ditë, teksa skuadra po përforcohet në çdo sektor. Afrimi i ri i Turbinës është i huaj dhe pikërisht nga kontinenti aziatik. Bëhet fjalë për një mesfushorë të majtë, 22 vjeç, që ka luajtur sezonin e kaluar në Poloni.
“Panorama Sport” zbulon se japonezi Toa Sugahara ka rënë dakord me drejtuesit dhe pritet t’i bashkohet ekipit në ditët në vijim. Mësohet se Sugahara është një lojtar i shpejtë dhe teknik, teksa besohet se do t’i bëjë shumë punë cërrikasve. Ardhja e tij do ta bëjë edhe më të fortë mesfushën, duke rritur konkurencën në këtë repart. Është hera e parë që në skuadrën e Turbinës do të ketë një futbollist nga Azia.
Ky përforcim nuk do të jetë i fundit, pasi pritet të vijë dhe një sulmues brazilian. Gjithashtu, klubi është duke negociuar dhe me lojtarë nga Kategoria e Parë, por edhe ekipe nga Superliga. Merkatoja e Turbinës pritet të shoqërohet me surpriza, të paktën kështu kanë premtuar drejtuesit. PFutbollistë me emër pritet të mbërrijnë shumë shpejt në Cërrik.
MARIGLEN MIRAKA – PANORAMASPORT.AL
NDIQE LIVE "PANORAMA TV"