Për Besëlidhjen, 17 nëntori ka qenë ditë feste. Zyrtarisht dje kanë mbushur plot 90 vjet. Është pikërisht kjo dita e regjistrimit në FSHF dhe emrin e parë e kanë pasur “Bardhyl”. Ishte viti 1930 kur skuadra do të merrte pjesë në të gjitha kompeticionet futbollistike në vend.

Në qershorin e atij viti, qeveria mbretërore e asaj kohe urdhëroi ngritjen e Federatës Shqiptare të Futbollit dhe krijimin e një ekip futbolli në çdo qytet ku mungonte një i tillë. Po atë vit nisi kampionati i parë kombëtar. Të parin takim zyrtar Besëlidhja e ka zhvilluar në Durrës ndaj Teutës, ndeshje që ka përfunduar me fitoren e kësaj të fundit me shifrat 7-1.

Sipas shtypit sportiv të asaj kohe, Bardhylin e kanë ndjekur shumë tifozë. Ata kishin udhëtuar me automjete, biçikleta, madje edhe në këmbë nga Lezha për të mos e humbur atë përballje. Në 90 vjet jetë, Besëlidhja ka milituar 25 sezone në Kategorinë Superiore, megjithatë u bë më shumë se një dekadë që i mungon kësaj lige.

Për herë të fundit merrnin pjesë në elitë në sezonin 2007-2008 dhe që nga ajo kohë lufton për t’u rikthyer dhe shpresojnë që për ditëlindjen e 90-të t’ia dalin. Besëlidhja është shpallur 8 herë kampione e Kategorisë së Parë, fillimisht në vitin 1937 dhe gjatë historinë e saj, ka rënë dy herë në Kategorinë e Dytë, konkretisht në edicionet 1960-1961 dhe 2013-2014.

PRENG GJIKOLA – PANORAMASPORT.AL

NDIQE LIVE "PANORAMA TV"

---