GRUPI A

Të kuqtë ruajnë kreun në Laç

Partizani e ka nisur vitin me fitore në një fushë shumë të vështirë si ajo e Laçit. Skuadra e kuqe, e drejtuar nga Ylli Shehu, që pak ditë më parë triumfoi në Kupën e Shqipërisë, gjeti golat vetëm në pjesën e dytë ndaj kurbinasve. Smaçi dhe Prodani u bënë protagonistë të golave për të kuqtë. Goli i parë u realizua në minutën e 60-të, ndërsa për të vulosur suksesin mendoi mbrojtësi Prodani në 73-ën.

Trajneri Shehu e nisi lojën me këtë formacion: në portë ishte Shera, ndërsa në mbrojtje Prodani, Çela, Doksani dhe Fetaj. Në mesfushë u rreshtuan Qorri, kapiteni Bajrami, Smaçi, Hima dhe Daci, ndërsa në majën e sulmit ishte Vatnikaj. Për 19-vjeçarët e kuq ky ishte suksesi i 10-të në këtë kampionat. Tashmë “demat” e rinj janë ngjitur në kuotën e 32 pikëve, por janë në një rival të ashpër me Tiranën dhe Vllazninë. Si bardheblutë, ashtu edhe shkodranët kanë secila nga 30 pikë.

Super-Tirana bën spektakël në Lezhë

Ndeshja mes të rinjve të Tiranës dhe atyre të Briansit ishte mjaft e fortë, por ekipi i Astrit Hafizit ishte mjaft i qartë në veprimet e tij. Kjo bëri që bardheblutë të merrnin një rezultat të thellë, 4-0, në Lezhë. Loja ka nisur mjaft e fortë, ku të rinjtë e Briansit ishin më agresivë, duke sulmuar për të zhbllokuar rezultatin, por kjo nuk zgjati shumë. Tirana e ndryshoi shpejt taktikën e lojës dhe kaloi në avantazh me anë të Keqës, pas një sulmi të shpejtë nga qendra e mesfushës.

Pas shënimit të golit të parë, Tirana e mori situatën plotësisht në dorë dhe Berisha dyfishoi shifrat me një gol spektakolar. Sulmet e miqve janë të shpeshta dhe të papërballueshme. Në fraksionin e dytë, vendësit u munduan të reagonin, por Tirana i goditi në momentin më të mirë, teksa Bardhi trefishoi shifrat. Ndonëse në disavantazh, të rinjtë e Briansit nuk arritën që të rikuperonin forcat, por i lanë terren kundërshtarit për të shënuar edhe golin e katërt, pikërisht me autor Topallin, që vulosi në këtë mënyrë fitoren.

Preng Gjikola

Bindin shkodranët

Vllaznia bën poker ndaj Internacionalit, në një ndeshje ku iu desh shumë punë për të arritur te fitorja. Pjesa e parë u mbyll në barazim 1-1. Golit të Isufit iu përgjigj Curri, ndërsa në 45 minutat e dyta shkodranët shpërthyen. Pusi realizoi dy herë, ndërsa autor i një goli u bë edhe Palushani. Në minutën e 76-të shënoi edhe Çema për miqtë.

Admir Uruçi

Portos i mjafton Danaj

Ndryshe nga U-17, të rinjtë e Portos kanë fituar përballë Akademisë me rezultatin minimal 1- 0. Loja ka nisur e qetë nga të dyja skuadrat. Janë vendësit që japin të parët sinjalin për ndryshim rezultati, por gabojnë. Në minutën e 38-të ishte Danaj që merr një top në formë krosi dhe nuk fal, duke e dërguar në rrjetë dhe dhuruar tri pikë lezhjanëve.

Preng Gjikola

Kukësi 1 – 0 Shkëndija

Një gol ka vendosur ndeshjen në Kukës mes të rinjve vendës dhe Shkëndijës së Tiranës. Skuadra që përfaqëson shkollën “Loro Boriçi” ka dalë e humbur nga stadiumi “Zeqir Ymeri”, në një ndeshje shumë të luftuar nga të dyja skuadrat. Dështimi në Kukës e largon gjithnjë e më shumë Shkëndijën nga ekipet e kreut, ndërsa për veriorët kjo fitore ishte shumë e rëndësishme në luftën për mbijetesë në Superiore.

GRUPI B

Goleadë e vlonjatëve

Fitore e thellë e Flamurtarit të Dritan Resulit. Vlonjatët kaluan pa vështirësi Shkëndijën e Durrësit, teksa diferencën e bëri dopieta e Sadushit, si dhe golat e Qarrit, Dalanajt dhe Aliajt. Vetëm në një moment të pjesës së parë miqtë kanë barazuar përkohësisht. Ndërkohë, këtë takim e ka ndjekur edhe presidenti i Flamurtarit, Sinan Idrizi.

Kastriot Brahimaj

8 gola për 1 pikë

Gola pa fund për një pikë dhe kartonë të shumtë. Kjo është tabloja e ndeshjes ndërmjet Teutës dhe Elbasanit, që përfundoi me rezultatin 4-4. Edhe pse ka pasur kontestime nga të zotët e shtëpisë për arbitrimin, vlen të theksohet se durrsakët e kanë mbyllur takimin me 9 lojtarë pas daljes me të kuq të Ajdinit dhe Ujka prej ndërhyrjeve të rënda.

Jeton Rexhmati

Shkëlqen Skënderbeu

Skënderbeu ka mposhtur 4-1 Dinamon, në një ndeshje që në fakt ka qenë shumë e luftuar. Edhe pse humbja ishte e thellë, vlen të theksohet se dinamovitët kanë bërë një lojë të pëlqyeshme, por kanë qenë në shumë raste të pafat. Osmanllari, Mara dhe dopieta e Kuotosis vendosën takimin. Për blutë e Olsi Ukut golin e vetëm e shënoi Kelo me penallti.

Abdulla Dushku

Besa befasohet në shtëpi

Besa ka humbur ndaj AF Dinamos në shtëpi, në një takim që ndoshta nuk e meritonte të linte tri pikë. Kavajasit ishin të dënuar nga mungesat e Brahimajt, Hoxhës, Mashës e Carës, që tashmë luajnë te Besa e madhe, por edhe Hykës me 3 kartonë. Goli i Pjetrës në minutën e 77-të vulosi ndeshjen në Kavajë, ndërkohë që gaboi në dalje portieri Puja.

Feriz Ferizaj

Fejzaj nderon Lushnjën

Në “Roza Haxhiu” Lushnja mundi Pogradecin 1-0. Skuadra e trajnerit Emilio Çukani u rikthye te fitorja pas tri humbjeve radhazi. Pas një ore lojë, golin e fitores për të rinjtë lushnjarë e shënoi futbollisti më i mirë në fushë, Fejzaj. Me një goditje të zgjuar brenda zonës, ai mposhti portierin Sulollari. Kjo mjaftoi për tri pikët e vendësve.

Alban Alushi

NDIQE LIVE "PANORAMA TV"

---