Kategoria e Parë / Dinamo dhe Elbasani ndajnë pikët, fitore e artë për Turbinën
Ndeshjet e sotme në Grupin B të Kategorisë së Parë për zonën play-out kanë dhuruar dy duele të ndezura mes skuadrave që rrezikojnë seriozisht rënien në fund të sezonit.
Sfida e parë ishte ajo mes Dinamos dhe Elbasanit në Pezë, ku dy palët kanë ndarë pikët në barazimin 1-1, i cili gjithsesi ka ardhur vetëm me gjuajtjen e fundit në portë. Elbasani, ndonëse me dhjetë lojtarë që nga minuta e 26-të pas kartonit të kuq të Dostit, mori kryesimin me Peqinin kur mbeteshin edhe 15 minuta për të luajtur. Por gjuajtja e Ejoh në minutën e katërt shtesë bëri që dy ekipet të kënaqeshin me nga një pikë që nuk ndryshon pozitat e tyre në klasifikim.
Ndërkaq, ka rokadë në kreun e grupit, pas fitores 1-0 të Turbinës përballë Apolonisë. Cërrikasve, të ndihmuar edhe nga kartoni i kuq i Mehmetit, u mjaftoi goli i Roshit (68’) për tri pikët të cilat i ngjitin në kreun e renditjes së këtij grupi dhe u japin një distancë sigurie nga ekipet që rrezikojnë rënien.
NDIQE LIVE "PANORAMA TV"