Në sezonin që lamë pas, Xhynejt Çutra ishte njëri ndër mesfushorët më të mirë të Kategorisë së Parë. Golat e bukur të shënuar prej tij bënë xhiron e rrjetit, aq sa ofertat nuk i munguan jo vetëm nga vendi, por edhe nga Izraeli, ku u kërkua në merkaton e janarit. Drejtuesit në atë kohë nuk e pranuan që t’iu ikte një mesfushor i tillë nga “duart” dhe favori i tyre ishte kontrata që kishin. Tashmë që marrëveshja ka përfunduar dhe klubi ia ka ofruar sërish një rinovim lojtarit, palët janë në bisedime.

Lojtari zbulon për “Panorama Sport” se e shqyrton me detaje propozimin e ri të bërë nga drejtuesit e Kastriotit dhe gjasat janë që të shkojnë te firma. “Që pas përfundimit të finales me Tiranën, po shijojmë pushimet dhe njëkohësisht i kemi kushtuar edhe rëndësi mbajtjes së trupit në formë me stërvitje individuale për çdo ditë. Pasi mbyllëm një sezon të suksesshëm në Kategorinë e Parë, dalëngadalë po vjen koha që të bëhemi gati për misionin ‘Superiore’.

Normalisht, dihet që diferencat janë të mëdha mes dy kampionateve dhe për ne nuk do të jetë e lehtë, por ruajtja e boshtit të sezonit të shkuar, afrimi i lojtarëve cilësorë na bën që të besojmë që nuk do të jemi kalimtar në elitë”, tha fillimisht mesfushori. I pyetur për zgjedhjen e tij për të vazhduar karrierën, 29-vjeçari deklaroi se pavarësisht ofertave, Kastrioti është zgjedhja e tij e parë. “Më 31 maj, ashtu si pjesës dërrmuese të skuadrës, edhe mua më përfundonte kontrata. Po negociojmë me drejtuesit për kontratën e re dhe parimisht kemi rënë dakord për të gjitha pikat. Unë jam prej tre vitesh pjesë e kësaj skuadre dhe e kam shumë të vështirë të largohem prej këtu, pavarësisht ofertave”, përfundoi Xhynejt Çutra.

Liridon Pasha

NDIQE LIVE "PANORAMA TV"

---