Skuadra krutane po përjeton një situatë jo të kënaqshme në kampionat, ku pas startit mbresëlënës që fituan 1-0 në Gjirokastër, Kastrioti është ndëshkuar në tri sfidat pasuese. Ekipi i drejtuar nga trajneri Elvis Plori ka nisur ditën e djeshme javën përgatitore për ndeshjen me Laçin. Seanca e djeshme ka nisur me një analizë të gjatë të humbjes me Kamzën.

Për rreth 60 minuta, stafi teknik ka zhvilluar analizë të detajuar, me dyer të mbyllura, me lojtarët që u aktivizuan në ndeshjen e së shtunës ndaj Kamzës. Nga burime të gazetës pranë ekipit, mësohet se është diskutuar me detaje paraqitja e dobët që Kastrioti bëri në ndeshjen e fundit. Përpos evidentimit të gabimeve të bëra nga lojtarët në këtë takim, është kërkuar kthesa në ndeshjen e radhës, pasi në të kundërt do të ketë penalitete.

Në ndeshjen e radhës pritet që të ndryshohet diçka, qoftë në rreshtim apo edhe në lojtarët që do të zbresin në fushë nga minuta e parë. Fatmirësisht, gjatë kësaj periudhe nuk ka pasur dëmtime dhe trajneri Plori do të ketë në dispozicion 25 lojtarë për të ideuar formacionin anti-Laç. Me interes pritet debutimi i tre kamerunasve, të cilët debutuan në Kupë ndaj Korabit.

Bujar Balliu

NDIQE LIVE "PANORAMA TV"

---