Kartonët/ Tirana ekipi më “fair play”, bardheblutë e disiplinuar e mbyllin fazën me 17 të verdhë
Tirana e nis aty ku e la. Edhe pse vjet ranë nga kategoria, bardheblutë u shpallën skuadra më “fair play” për sezonin 2016-2017. Si shpërblim për sjelljen e mirë morën nga FSHF-ja një shumë prej 15 milionë lekë të vjetër. Edhe këtë herë po ndjekin të njëjtën rrugë, por me ndryshimin e vetëm të madh që lidhet me renditjen. Nëse Kategorinë Superiore e mbyllën në vendin e parafundit, në Kategorinë e Parë janë në krye të grupit B dhe me 4 pikë të shkëputur nga rivali më i afërt, Bylisi.
Disiplina është bazike për kryeqytetasit dhe këtë herë “matjen” mund ta bëjmë fare mirë me kartonët. Në 8 javët e para të kampionatit ishin thuajse perfekt, pasi lojtarët bardheblu numëronin vetëm 15 të verdhë në total. Por, shifrat pozitive i prishi Alket Çelhaka në transfertën e javës së 9-të në Shënkoll, ku mori dy herë kartonë të verdhë në harkun e 19 minutave dhe rrjedhimisht la fushën e lojës me të kuq. E thënë ndryshe: faza e parë u mbyll zyrtarisht me 17 kartonë të verdhë.
Sakaq, lojtari më i ndëshkuar te Tirana është Marvin Turtulli, i cili ka marrë “stafetën” nga Erjon Hoxhallari, i cili vjet numëronte më shumë kartonë. Qendërmbrojtësi numëron tre të verdhë deri më tani, ndërsa e pasojnë me nga 2 sulmuesit Sentamu dhe Ngoo. Në total, lojtarët që janë penalizuar nga arbitrat në 810 minuta janë 12. E vetmja skuadër që i ndjek është Turbina e vendit të parafundit, që gjithashtu ka marrë 17 të verdhë direkt dhe asnjë të kuq. Skuadrat e tjera numërojnë shumë më shumë, ndërsa Tomori mban rekord, pasi ka marrë plot 25 deri më tani.
Skuadrat që janë “skuqur” më së shumti janë Naftëtari me Shkumbinin, që deri më tani kanë marrë dy të kuq direkt. Kur të bëhet përllogaritja prej FSHF-së, kryeqytetasit do fitojnë “pikë” edhe prej tifozëve. Edhe pse protestat e tyre nuk janë ndalur kurrë, e vetmja herë që janë dënuar nga Disiplina, përkon me javën e fundit. Tymueset e hedhura prej tyre sollën edhe ndërprerjen e takimit, ndaj Tirana është e detyruar që Pogradecin ta presë me dyer të mbyllura.
ADELA MERKO
NDIQE LIVE "PANORAMA TV"