Kamza mposht edhe të rinjtë e Partizanit. Skuadra e drejtuar nga Ndreu, veç ngarkesave stërvitore, nuk ka lënë pas dore as ndeshjet testuese. E radhës u zhvillua mbrëmë, ndërsa përballë kishin 19-vjeçarët e akademisë së kuqe. Ky duel u shërbeu ndjeshëm kamzalinjve.

Ata ndoqën nga afër jo vetëm blerjet e reja dhe lojtarët në provë, por edhe për të evidentuar ndonjë element nga skuadra mike. Për sa i përket kronikës së ndeshjes, ajo ka qenë e zotëruar pothuajse totalisht gjatë pjesës së parë nga kamzalinjtë ku ka shkëlqyer lojtari i ardhur në provë, Mërgim Neziri dhe duke se ka bindur plotësisht stafin.

Madje ky me një supergol nga rreth 30 metra ka shënuar dhe golin hapës të ndeshjes. Më pas, në fraksionin e dytë, ka dyfishuar vlonjati Hektor Idrizaj, që shënon një gjuajtje të bukur, duke ia kaluar parabël topin portierit Hida.

Në të 61-ën, është Daci që ngushton shifrat në 2-1, me një gol të realizuar paralel me vijën fundore. Por në të 82-ën mendon i riu Kejvi Xhafa që t’i vendosë “vulën” rezultatit të kësaj miqësoreje. E veçanta e këtij takimi ishte gjykimi, ku pas një dëmtimi është rikthyer gjyqtari i Superligës shqiptare, Klajdi Kola.

NDIQE LIVE "PANORAMA TV"

---