Paulo Dibala nuk ia ka dalë për ta nisur si tit ullar. Të paktën kjo është ajo që rezervuan pamjet e stërvitjes së djeshme, ku numri 10 bardhezi nuk arriti të kalonte testin e forcës, ndonëse vazhdoi që të stërvitej me topin, veçmas grupit. Ky është një lajm aspak i bukur për bardhezinjtë, ndonëse ka edhe nga ato media, të cilat mendojnë se ndoshta ky mund të jetë një blof edhe nga ana e trajnerit Mauricio Sarri, deri në momentin e fundit, përpara fillimit të ndeshjes për të kapur në befasi Lionin.

Gjithsesi, duke lënë mënjanë se diçka e tillë mund të jetë gjithashtu e vërtetë, pa Dibalën Mauricio Sarri do t’i besojë Gonzalo Higuainit në vijën e parë të sulmit, përkrah Ronaldos, por edhe Kuadrados që do të spostohet nga mbrojtja (aty ku pritet të luajë Danilo), në korsinë e djathtë të sulmit. Prandaj, në pritje për të kuptuar nëse Dibala do të jetë me skuadrën apo jo, diçka që do të mësohet paraditen e sotme, kur të zyrtarizohet edhe lista, pas kryerjes së tamponëve, Juventusi duket se e ka të detyruar formacionin, me dyshimin e vetëm në mesfushë mes Pjaniçit e Ramsejt.

RONALDO I KARIKUAR – Pa Dibalën, është normale që të gjitha shpresat e Juventusit të jenë të varura te Kristiano Ronaldo. Yllit portugez i kërkohet një tjetër mbrëmje magjike si ajo e sezonit të kaluar kundër Atletikos së Madridit, të cilën e përmbysi me një tripletë, pasi ishin mundur jo 1-0 si ndaj Lionit, por 2-0 me Atletikon, në Madrid. Për të karikuar edhe më shumë 35- vjeçarin juventin ka menduar dje edhe uebsajti i UEFA-s, i cili në një postim për CR7-ën ka dashur të kujtojë jo vetëm disa nga goditjet e tij mjeshtërore ndër vite, në kompeticionin ku ai mban rekordin e golave, por edhe faktin se nëse triumfon sivjet, Ronaldo do të bëhej i vetmi lojtar në histori që do të fitonte 6 Champions në karrierë.

JETON STAMOLLA – PANORAMASPORT.AL

NDIQE LIVE "PANORAMA TV"

---