Me dy ndeshjet e zhvilluara dje në Kamzë, ka nisur dhe java e fundit e kampionatit të Kategorisë së Tretë.

Fillimisht kanë dalë në fushë Drini dhe Spartaku. Të dyja skuadrat kanë zhvilluar një ndeshje mjaft të bukur e të fortë, por në fund nuk pati gola dhe fitues.

Sulmuesit nuk i kanë finalizuar dot rastet, por edhe për meritë të dy portierëve. Beqollari godet dy herë portën, por Bojan pret shkëlqyeshëm. Ndërsa Drini në fraksionin e dytë pati dy mundësi shënimi.

Në të 58’, Doçaj godet fort, por topi kalon ngjitur me shtyllën pingule. Ndërsa Klidjan Hasalami në të 78’ godet nga 25 metra e topi kalon rrafsh me traversën e Bahollit.

Në ndeshjen e dytë, Skrapari ka mundur 5-2 Eagles, duke i bërë një mbyllje fantastike sezonit.

Shifrat u zhbllokuan nga 17- vjeçari Elton Lame para fundit të pjesë së parë.

Më herët dy lojtarë janë konfliktuar me njëritjetrin, Lamçe dhe Elezi, të cilët gjyqtari Bacaj i nxori me të kuq.

Në fraksionin e dytë skraparllinjtë kanë shënuar dhe 4 gola, të ndarë me dy dopieta, fillimisht Rrushi i sapofutur në lojë dhe më pas Demko.

Për “shqiponjat” kryeqytetase shënuan Murrja dhe Haxhiaj. Gara mbyllet më 4 maj, kur në Tropojë do të luhet Valbona-Osumi dhe ndoshta në “Selman Stërmasi” Delvina-Elbasani.

ABDULLA DUSHKU – PANORAMASPORT.AL

NDIQE LIVE "PANORAMA TV"

---