Itali e çmendur, 9 gola ndaj Armenisë për 10 rekorde
Fitorja ndaj Armenisë vulosi rrugëtimin e përsosur të Italisë në eliminatoret e Europianit të vitit të ardhshëm. Por, tri pikët e djeshme vlejtën edhe për dhjetë rekorde, të cilat vijojnë si më poshtë:
1- E djeshmja ishte fitorja e 11-të radhazi për Italinë e Mançinit. Skuadra e përmirësoi rekordin e saj të vendosur katër ditë më parë ndaj Bosnjës.
2- Me 11 suksese radhazi Roberto Mançini bëhet trajneri që ka fituar më shumë ndeshje radhazi në stolin e “Axurrëve”.
3- Me 13 fitore në 19 ndeshje, Roberto Mançini barazon një primat të vendosur nga Arrigo Saki.
4- Fitorja ndaj Armenisë shënoi suksesin e dhjetë në 10 ndeshje të luajtura. Rekord absolut për një grup eliminator të Europianit.
5- E djeshmja ishte fitorja e 14-të radhazi për Italinë për sa u përket eliminatoreve të Kampionatit Europian.
6- Me suksesin ndaj Armenisë, “Axurrët” shënuan një rekord pathyeshmërie në ndeshje radhazi (40) të vlefshme për eliminatoret e një Kampionati Europian (primat absolut).
7- Fitorja e djeshme vlejti për të vendosur një rekord fitoresh radhazi për një kombëtare gjatë një viti diellor.
8- Rekord absolut fitoresh (10) gjatë një viti, duke kapërcyer kështu rekordin e vendosur në 1990-ën dhe barazuar arritjet e viteve 1994, 2000 dhe 2003.
9- Tri pikët ndaj armenëve shënuan arritjen e 30 pikëve në grupin eliminator. Pikë të plota për Italinë në grup janë rekord absolut.
10- Nëntë gola në një ndeshje të vetme eliminatore Italia nuk i kishte shënuar kurrë në historinë e saj. Hera e fundit me 9 realizime në një takim zyrtar për italianët ishte shënuar në 1948- ën në Lojërat Olimpike të organizuara në Londër në një ndeshje kundër Shteteve të Bashkuara të Amerikës.
PANORAMASPORT.AL
NDIQE LIVE "PANORAMA TV"