“I lutem Zotit që Teuta të mos zbresë nga Kategoria Superiore dhe Luftëtari të kapë Kupat e Europës”. Kështu shprehet ish-portieri i njohur gjirokastrit, Miço Çaro, i cili ka luajtur për të dyja skuadrat në vitet ’60-’70. Në një bisedë për “Panorama Sport”, legjenda e portës gjirokastrite flet për ecurinë e Luftëtarit, si dhe ndeshjen e radhës ndaj durrsakëve, duke kujtuar me nostalgji edhe kohën kur luante me Teutën.

“Gjirokastra dhe Durrësi kanë një traditë të madhe në futboll. Personalisht me Teutën më lidhin tri vite të paharrueshme, kur m’u desh të mbroja portën e Lokomotivës së dikurshme. Teuta më dha emër në futbollin shqiptar, por ndiej keqardhje që tashmë rrezikon kategorinë.

Në ndeshjen e së hënës, si gjirokastrit do të dëshiroja fitoren e Luftëtarit, por me shpresën që Teuta të mbijetojë. Dua të kujtoj se me fanellën e Luftëtarit kanë luajtur shumë durrsakë, emra të mëdhenj si: Golashi, Zalla, Llambi, Spahiu, Leshteni e Doçi.

Ishin këta futbollistë që në fund të viteve ’60 ia dolën të rikthenin Luftëtarin në Kategorinë e Parë pas 15 vitesh vuajtje në inferiore. Sa i përket ndeshjes, të dyja skuadrat do të luajnë të hënën, nisur nga objektivat që kanë, jam i bindur se do të dhurojnë një 90-minutësh të bukur”, deklaroi 79-vjeçari, i cili prej dekadash është trajner portierësh dhe në 20 vitet e fundit ka punuar në disa skuadra të Athinës.

Në fund, Çaro komplimentoi trajnerin Milinkoviç dhe presidentin Tavo. “Falë profesionalizmit të tyre, mendoj se skuadra e meriton plotësisht të përfundojë kampionatin në vendin e katërt”, përfundoi ishportieri.

Tomor Shehu

NDIQE LIVE "PANORAMA TV"

---