Investime dhe projekte infrastrukturore. Kjo ka qenë tema kryesore e mbledhjes së Komitetit Ekzekutiv të FSHF-së, i cili ka hapur dritën e gjelbër që të shpenzojë paratë e komunitetit të futbollit për të përmirësuar infrastrukturën sportivë në vend. Gjithçka normale, siç duhet të jetë në çdo federatë. Por…

Mes vendimeve të sotme, spikat miratimi me “unanimitet të plotë” i investimit në sistemin e ndriçimit në Kompleksin Tropikal. Në teori, nuk duket se ka ndonjë gjë të keqe, pasi në fund të fundit, ai është hoteli në të cilin grumbullohet e stërvitet Kombëtarja A e shumë të tjera. Në praktikë, ka shumë arsye pse ky vendimi i Ekzekutivit lë vend për debat.

Një investim i tillë, në një biznes privat, edhe pse në shërbim të Kombëtares, duket i tepruar kur mendon se FSHF ka një kompleks për ekipet Kombëtare të gatshëm, ndërsa po ndërton një të dytë që nuk dihet se kur përfundon e kur do të vihet në punë. Një shpenzim i tillë, në momentin kur shumë klube kanë nisur kambanat e alarmit për gjendjen e terreneve të tyre stërvitore, sigurisht që nuk do të lërë një shije të mirë në komunitetin e futbollit. Mjafton të shohësh Teutën kampione që ka probleme me fushën e stadiumit të saj si dhe Vllazninë fituese të Kupës që nuk ka ende një fushë të përshtatshme për stërvitje, që të kuptosh se mangësitë në infrastrukturë te familja e futbollit shqiptar nisin që nga maja, për të mos vazhduar më pas me dhjetëra klube më poshtë në piramidën e tij.

Me sa duket Ekzekutivi mendon “unanimisht” se ka zgjidhur çdo telash brenda familjes së futbollit dhe tashmë ka ardhur koha që të shohë për investimet jashtë saj.

PANORAMASPORT.AL

NDIQE LIVE "PANORAMA TV"

---