I mohoi 11-metërshin Mitroviçit, serbët akuzojnë: Gjyqtari Bryzh mori 2 mln euro nga mafia shqiptare

Panorama Sport | Lajmet e fundit nga sporti

Postuar: Korrik 8, 2018 | 18:08

I mohoi 11-metërshin Mitroviçit, serbët akuzojnë: Gjyqtari Bryzh mori 2 mln euro nga mafia shqiptare

Ishte një vendim shumë i dyshimtë, ai i FIFA-s që vetëm pas një ndeshje të gjykuar, e dërguan në shtëpi arbitrin gjerman. Feliks Bryzh nga Mynihu është arbitri që përfaqësoi Gjermaninë në Botëror. Ai gjykoi vetëm një ndeshje dhe më pas nuk u pa më në fushën e blertë. Kjo, sepse ai u kontestua shumë nga pala serbe pas një 11-metërshi të mohuar për skuadrën e tyre. Por, arbitri tani ka folur për herë të parë që pas përjashtimit nga turneu.

Mitrovic

Ai pretendon se nuk është ndihmuar nga kolegët e tij që ndodheshin në sistemin “VAR”. Bëhet fjalë për Feliks Zvajer që gjykon me Bryzhin në kampionatin gjerman. “Kolegët që ndodheshin në ‘VAR’ nuk më ndihmuan të merrja një vendim të saktë në rastin e pretenduar për penallti nga Serbia”, mendohet të jetë shprehur arbitri gjerman. Një rast ky që ka ngjallur shumë polemika, pasi Serbia u mund në fund të takimit me rezultatin 2-1 nga Zvicra.

GJyqtari

Serbët të tërbuar bën një ankimim në FIFA, ku përveç këtij momenti ata akuzonin arbitrin gjerman për një gjykim në favor të skuadrës zvicerane. “Arbitri fliste gjatë gjithë ndeshjes gjermanisht me lojtarët zviceranë duke mos u treguar aspak profesionist në fushën e lojës”, u shpreh federata serbe pas ndeshjes. Ndërkohë, gazeta serbe “Informer” ka botuar në faqen e parë një shkrim ku akuzonte arbitrin gjerman se kishte marrë 2 milionë euro nga mafia shqiptare për të favorizuar Zvicrën.

matic67_660x388

Në Serbi humbja dhe eliminimi nga Botërori duket se i ka detyruar gazetarët të shfrenojnë fantazinë, pasi ky lajm është i rëndë për të qenë real. Feliks Bryzh është prej kohësh një nga arbitrat më të mirë në Bundesligë dhe në arenën ndërkombëtare ka gjykuar shumë ndeshje të rëndësishme. Përfshi këtu edhe ndeshjen e finales së Champions-it midis Realit të Madridit dhe Juventusit në finalen e luajtur në Kardif.

mitrovic

Gjithsesi, është e vështirë ta besosh se FIFA ka marrë vendimin për të përjashtuar arbitrin nga Botërori nisur nga ky fakt. Ajo që është e sigurt, është se Bryzh nuk është ndihmuar nga kolegu e tij Zvajer dhe bashkëpunimi në rastin e 11- metërshit ka dështuar. I njëjti episod ndodhi edhe në ndeshjen midis Brazilit dhe Belgjikës ku pas një faulli të shkaktuar në zonë ndaj Gabriel Xhezuz, Zvajer i ndoshur në “Var” dështoi të jepte një penallti edhe pse faji ra mbi italianin Orsato, që ishte përgjegjës kryesor në “VAR” për atë takim.

NDIQE LIVE "PANORAMA TV"