Humbja ndaj Dinamos, flet trajneri i Burrelit: Arbitri na frenoi që në fillim

Panorama Sport | Lajmet e fundit nga sporti

Postuar: Mars 26, 2021 | 16:17


Humbja ndaj Dinamos, flet trajneri i Burrelit: Arbitri na frenoi që në fillim

Samuel Nikaj e ka me vetëkënaqësinë dhe gjykimin pas humbjes ndaj Dinamos. Trajneri i Burrelit pretendon se lojtarët e morën ndoshta më lehtë sesa duhej, por u frenuan nga gjykimi në “Selman Stërmasi”.

Nikaj

“Vinim në këtë takim me moral të lartë, por me sa duket, ndikoi në një formë vetëkënaqësia. E dyta, menaxhimi nga ana e arbitrit na frenoi që në fillim. Sikurse dihet, ne e kemi përgatitur ekipin tonë me frymën e optimizmit. Jemi një ekip vrulli e dëshire për të luajtur me bazë luftën e fortë sportive, por gjykimi nuk na lejoi dhe na frenoi që në fillim me dy kartonë të shpejtë të verdhë.

Për sa i përket ecurisë së mëtejshme, ne ia falëm dy golat Dinamos. Ata nuk erdhën për meritë të tyre. Kundërshtari i shfrytëzoi këto gabime të mbrojtjes sonë. Shoh që presioni për vendin e parë ndihet e kjo ka ndikuar te disa lojtarë. Mund të them se kjo luftë do të vazhdojë deri në fund.

Humbja nuk na ul moralin dhe forcën tonë për të vazhduar pretendimet. E nisëm kampionatin thjesht për të qenë në 4-shen e parë. Tashmë ky objektiv u realizua. Lufta do të jetë e bukur mes tri ekipeve: Dinamo, ne dhe Korabi. Kam besim te djemtë e mi, pasi kemi ndërtuar një skuadër të aftë për të qenë në Superiore”, tha shkodrani pas ndeshjes.

PANORAMASPORT.AL