Historia pikante/ Marok-Spanjë në 1961-shin, kur u “aplikua” VAR-i i modës së vjetër

Panorama Sport | Lajmet e fundit nga sporti

Postuar: Dhjetor 5, 2022 | 20:19

Historia pikante/ Marok-Spanjë në 1961-shin, kur u “aplikua” VAR-i i modës së vjetër

Fqinjë, jo gjithmonë me marrëdhënie të mira dhe me një rivalitet me pak përvojë për sa i përket futbollit. Spanja dhe Maroku do të luajnë të martën në “Education City” për një vend në çerekfinale të Kupës së Botës në Katar.

sddefault

Do të jetë dueli i madh i një hasmërie sportive që ka vetëm tre precedentë zyrtarë. Në nëntor 1961 dy kombëtaret u përballën për një vend që të çonte drejtpërdrejtë në Kupën e Botës në Kili. Më parë, Spanja kishte luajtur dy miqësore kundër Marokut, por në të dyja rastet dërgoi skuadrën e saj B: 3-3 në Kazablanka, më 15 maj 1960 dhe 4-3 në Granada në po atë vit.

Rrugës për në Kili 1962, Spanja eliminoi fillimisht Uellsin (1-2 në Kardif dhe 1-1 në Madrid) për t’u çiftuar më vonë me Marokun në një sfidë të dyfishtë që vlente një biletë Botërori. Më 12 nëntor 1961, më shumë se 30,000 njerëz mbushën tribunat e stadiumit të Kazablankas.

Kjo ishte e para nga katër ndeshjet që Ferenc Pushkash (Hungari) luajti me skuadrën spanjolle. Në moshën 34-vjeçare, përfshirja e golashënuesit të madh hungarez (84 gola në 85 ndeshje) në “La Roja” ngjalli dyshime në shumë qarqe.

NJË VAR I MODËS SË VJETËR –Debutimi i Pushkashit rezultoi në një fitore të shumëvuajtur të Spanjës falë një goli të Del Sol me kokë pas një shpërthimi nga Gento. Pavarësisht protestave në tribuna dhe lojtarëve marokenë në fushë – ata bënin thirrje për pozicion jashtë loje – zvicerani Melet e cilësoi të rregullt golin e Spanjës. Maroku u bind ta niste sërish topin nga qendra.

Por para nisjes së lojës erdhi rishikimi i golit. Nga tribuna zbriti në fushë një person me prejardhje të qartë afrikane. Gjyqtari ndërpreu lojën dhe me këmbënguljen e marokenëve shkoi të konsultohej me vijërojtësin. Ai nuk ndryshoi mendje dhe loja rifilloi me golin e Spanjës.

Nuk mbaron me kaq, sepse personi i ngarkuar për të shënuar golin në tabelën e rezultatit vendosi të mos e shkruajë golin spanjoll. Për disa minuta, publiku besoi se 0-0 ishte rezultati i saktë dhe goli ishte anuluar. Situata surreale nuk u rregullua pothuajse deri në fund të takimit kur u shfaq përbri emrit të Spanjës. Me fitoren në Kazablanka, gjithçka dukej e lehtë për të qenë në Kili. Por kthimi në Madrid ishte gjithashtu me probleme.

Dy herë Spanja kaloi përpara dhe dy herë barazoi Marokun. Në fund “La Roja” fitoi 3-2, por ndjesia që kishte lënë loja e spanjollëve te publiku nuk ishte aspak e këndshme. Madje publiku spanjoll përgëzoi Marokun, duke fërshëllyer lojtarët e vet.

PANORAMASPORT.AL