Higuain: Benzema e meriton “Topin e Artë”, Mesi dhe Kristiano Ronaldo madhështorë!

Panorama Sport | Lajmet e fundit nga sporti

Postuar: Qershor 27, 2022 | 11:19


Higuain: Benzema e meriton “Topin e Artë”, Mesi dhe Kristiano Ronaldo madhështorë!

Ish-sulmuesi i Realit të Madridit, Napolit dhe Juventusit, Gonzalo Higuain, ka dhënë një intervistë për “TyC Sport” ku ka ndarë të gjitha momentet më kulmore të karrierës së tij. Argjentinasi, i cili tashmë aktivizohet në “MLS League” në SHBA është ndalur dhe te Karim Benzema dhe rivaliteti i përjetshëm mes Lionel Mesit dhe Kristiano Ronaldos.

HI 1

REALI I MADRIDIT – “Ata janë klubi më i madh në histori. Janë trofetë që kanë fituar që i bëjnë të tillë, kanë 14 Liga Kampionesh. Unë jam krenar që kam luajtur për Realin. Mbërrita aty kur isha një fëmijë, 19 vjeç, dhe kam kaluar 7 sezone të mrekullueshme. Çdo vit marrin lojtarët më të mirë, kjo e bën atë klubin më të madh në histori”.

BENZEMA – “Benzemanë e njoh që në moshën 19- vjeçare. Jo vetëm që shkuam mirë, kishim konkurrencë për të njëjtin pozicion, por gjithmonë kishim një marrëdhënie të mirë. Nuk më habit fakti që ai sot është lojtari më i mirë në botë. Ai e meriton plotësisht ‘Topin e Artë’. Mjafton të shihni se çfarë bëri në këtë sezon”.

KRISTIANO DHE MESI – “Po flasim për dy lojtarë të mëdhenj, të ndryshëm në karakter e në stil, por të jashtëzakonshëm. Janë këta dy lojtarë që kanë ndarë mes tyre trofetë e fundit të ‘Topit të Artë’. Një garë e fortë mes tyre që vështirë se do ta shohim më në një të ardhme të afërt. Por unë në fund do të zgjedh Leo Mesin”, ka thënë Higuain.

PANORAMASPORT.AL