Kthimi i basteve, si të mirëmbash një manastir me lekë nga prostitucioni

Panorama Sport | Lajmet e fundit nga sporti

Postuar: Gusht 31, 2022 | 17:25

Kthimi i basteve, si të mirëmbash një manastir me lekë nga prostitucioni

Akademiku Artan Fuga ka dalë kategorikisht kundër planit për të kthyer bastet sportive, qoftë edhe online, për të ndihmuar sportin në vend, apo edhe kulturën. Pas përfundimit të tavolinës së përbashkët ku u diskutua kthimi i basteve dhe në cilën formë mund të realizohej, Fuga ka reaguar duke theksuar se kjo është një lëvizje moralisht jo e pranueshme.

fuga

POSTIMI I ARTAN FUGËS

Turp që kemi pasur turp!

Të financosh sportin si politikë publike me lekët e marra nga taksat e industrisë të basteve online, është si të mbështesësh virtytin me anë të vesit!

Si ta them?

Si të mbështetësh prodhimin e filmave edukativë me gjobat që iu vihen videove pornografike me fëmijë! Sa më shumë video pedofilie, aq më shumë gjoba, aq më shumë filma edukativë për fëmijë!

Ose sikur të mbështesësh mirëmbajtjen e rrugëve me lekët e gjobave të shoferave të dehur apo të traktorëve që ecin kundravajtje në rrugë!

Sa më shumë traktorë në rrugë, aq më shumë gjoba, aq më shumë parà për të mirëmbajtur rrugët!

Babi lekët për librat dhe bibliotekën për fëmijët, ose për t’u blerë atyre kompjuter të lidhur në Internet, i bën rrush e kumbulla në baste, dhe me ato lekë fëmijën e mbetur pa kulturë kur të rritet e bëjmë tifoz futbolli!

Me një fjalë si të mirëmbash një manastir me lekë nga prostitucioni!

E gjitha mbrapsht! Dhe dëgjojmë pastaj fjalën “Turp” që kemi pasur turp dhe kemi mbetur pas me zhvillimin e sportit pa baste!

Turp që kemi pasur turp!

Lëre kur edhe kultura do u financoka nga lekët e taksave për bastet!!! T’ja plasësh gazit me vaj medet!!! Imagjinoni një film që trajton vuajtjen e një fëmije shqiptar që në shtëpi nuk ka asnjë mjet kulture, sepse buxhetin e bën babi rrushekumbulla, të financohet nga lekët e basteve!!!

Thënë këto, kuptohet që nuk kam asgjë me industrinë e basteve, madje me asnjë lloj industrie që fiton parà nga veset njerëzore, edhe nga striptiza, vuajerizmi, masturbimi, a çdo gjë tjetër.

Kushdo t’i harxhojë lekët e veta sipas qejfit! Kuptohet nëse i ka ato lekë!

Po turp që shteti të adresojë specifikisht që lekët e basteve zhvillojnë sportin!

Imagjinoj një portier në lojë: Aloooo, bastet??? He mo ta pres këtë penalltinë apo jo?

PANORAMASPORT.AL

NDIQE LIVE "PANORAMA TV"