– Stadiumi “Elbasan Arena” ishte “arnuar” nga zëvendësimet e ndenjësve të reja në ata sektorë që ishin thyer, duke bërë kontrast me ndenjëset më të hershme, edhe pse ishin në të njëjtën ngjyrë, e kuqe dhe zezë. Sakaq, edhe tapetit duket se po i vjen fundi, pasi dukej më i rënduar se zakonisht, kjo për shkak të ndeshjeve rekord që janë zhvilluar këta dy muaj.

– Presidenti i Tiranës, Refik Halili, nuk arriti dot që ta shihte në stadium golin e skuadrës së tij në minutën e parë, pasi mbërriti pesë minuta me vonesë. Me të ardhur, u ul krah presidentit të Teutës, Edmond Hasanbelliu, dhe atij të FSHF-së, Armand Duka, me këtë të fundit që i ka shpeshtuar prezencat e tij në stadium kohët e fundit. Halili erdhi me vonesë, por largohet i fundit nga stadiumi, teksa qëndroi në tribunë për të përshëndetur dhe duartrokitur ekipin.

– Grupimi ultras “Tirona Fanatiks” ishin “armatosur” mirë me flakadanë, të cilët i hodhën që në minutën e parë pas shënimit të golit, duke krijuar edhe një re tymi në stadium.

– Të dy golat e parë të sfidës pritën konfirmimin e VAR-it para se të akordoheshin përfundimisht nga Enea Jorgji.

– Gjatë një ndërhyrjeje me bërryl në dëm të tij, Kallaku qëndron i shtrirë në tokë. Pasi ngrihet me ndihmën e stafit, i kërkon llogari anësorit Bregasi pse nuk akordoi faull në dëm të tij.

– Për shkak të dëmtimeve të shumta të lojtarëve nga të dyja ekipet, Jorgji bëri shumë metra vrapim sa nga njëri cep i fushës në tjetrin vetëm për t’i pyetur se si ishte gjendja dhe nëse kishin nevojë për ndërhyrjen e mjekut.

– Pas disa rasteve të humbura në fushë, Redon Xhixhën e thërret një nga ndihmësit e Shehit për t’i dhënë udhëzime ekstra, në mënyrë që të mos gabonte më pranë portës.

– Orges Shehi tërbohet me portierin Visar Bekaj, pasi në minutën e 30-të ky i fundit rrezikon shumë duke mos larguar si duhet topin. Tekniku duke i bërtitur i kërkoi që në rast rreziku të largonte sa më shumë topin.

– Te grupimi ultras i bardhebluve nuk munguan individët që gjatë gjithë kohës e kishin kapur me Aleksin, duke e ofenduar.

– Aleksi bën edhe trajnerin në fushë, pasi merr një letër në dorë nga ndihmësi i Martinit, Bledar Hodo, për vendosjet që do të ketë ekipi në fushë, pas zëvendësimeve të fundit.

– Teuta u mund, por në fund lojtarët dhe stafi “ngushëllohen” me pica.

– Më në fund edhe Ilion Lika del negativ. Lojtari nuk ka më asnjë shenjë COVID-i dhe nga e hëna mund të nisë stërvitjen me bardheblutë.

– Nga të infektuarit me COVID vetëm Erjon Hoxhallari është në fushë. Pjesa tjetër ka qëndruar në pankinë.

VLADIMIR MEMA – PANORAMASPORT.AL

NDIQE LIVE "PANORAMA TV"

---