Galiç “alarmon” Laçin, pritet edhe futbollisti i Vllaznisë për mbrojtjen
Denis Pjeshka mund të jetë afrimi i radhës te Laçi. Mbrojtësi ka vendosur dje që të mos e vijojë më aventurën me Vllazninë. Duke qenë se ishte pa kontratë dhe i krijohet mundësia që të federohet, ka zgjedhur kurbinasit për sezonin e ri. Sakaq, mjaftoi ndeshja e parë në Kupë për të zbuluar talentet e reja. Dhe një ndër ta është Jon Mersinaj, 19-vjeçari i cili, veç aftësive në qendër të mbrojtjes, dëshmoi se ka një raport mbresëlënës edhe me golin.
Dopieta kundër Naftëtarit ishte pa dyshim një mesazh edhe për stafin teknik, që tashmë e tutje do ta marrë edhe më shumë në konsideratë për një vend në formacion. I riu i dalë nga Shkëndija Tiranës gjatë kësaj vere u testua te Lokomotiva e Zagrebit dhe i bindi drejtuesit e kroatë që të nënshkruanin një kontratë prej 4 sezonesh. Por, duke parë që hapësirat nuk mund t’i ishin të mëdha, klubi vendosi që ta huazonte te Laçi.
E megjithatë, jo gjithçka shkon “vaj” te kurbinasit. Fitorja 5-0 në Kuçovë i ka lënë me pasoja. Ivan Galiç ka pësuar një dëmtim që mund t’i kushtojë edhe Partizanin. Sulmuesi i majtë ka ndierë shqetësime edhe dje, çka shton dyshimet për gatishmërinë e tij për takimin e së dielës.
Kur dihet që koha në dispozicion është e shkurtër, shanset që ai të rikuperohet në kohë janë minimale. E megjithatë, mjekët do të bëjnë të pamundurën që kroati të rikuperohet. Dhe duhet thënë se në ofensivë nuk mungojnë cilësitë. Shitja e Myrto Uzunit ka hapur një “gropë” të madhe, por në klub besojnë se pasardhësi i tij do të jetë Elvi Berisha, sulmuesi i ardhur nga Spanja.
NDIQE LIVE "PANORAMA TV"