Futbolli është në kaos. Pandemia që ka pushtuar globin ka vendosur në dilema të mëdha edhe Kategorinë Superiore. Kur kanë mbetur për t’u luajtur edhe 10 javë nga mbyllja e këtij sezoni, që të gjitha ekipet dhe lojtarët janë me “sy e veshë” nga FSHFja. Në Gjirokastër po e respektojnë në maksimum karantinën, e megjithatë jo të gjithë janë “pro” nisjes së aktivitetit. Frika bën që disa ta shohin të udhës që kampionati të mos rinisë. Kështu mendon edhe Erald Hyseni, mesfushori beratas i Luftëtarit. Sikurse të tjerët, po stërvitet në kushtet e shtëpisë. Por, sipas tij kjo nuk mjafton për të mbajtur trupin në formë.

“Unë nuk e shoh të udhës rinisjen e kampionatit. Janë shumë arsye që më bëjnë të them se nuk është situata e duhur për të luajtur futboll. Po flasim për një lojë kolektive, që dallon nga sportet e tjera që luhen me më pak sportistë, ose me një-dy individë. Kohëzgjatja e karantinës nuk do të na lejojë ne si lojtarë të shprehemi mirë në fushë. Do të na duhet një periudhë e gjatë stërvitje për ta rimarrë veten. Sado dhe sido që të stërvitesh në shtëpi, nuk mund të jesh i gatshëm për një apo dy javë. Është njësoj sikur hyn në kampionat nga periudha e fazës përgatitore, që minimalisht do më shumë se një muaj e gjysmë. Nuk mund të futesh në garë i papërgatitur. Besoj se do të na duhet një muaj fazë përgatitore, nëse vërtet duam të rifutemi me seriozitet në garë”, kështu u shpreh fillimisht mesfushori, gjatë një bisede me “Panorama Sport”.

Më tej ai thekson se do të ishte e duhura që të ndryshojë edhe skema e kampionatit, teksa propozon që Luftëtari dhe Flamurtari të mos mbeten në elitë.

“Përderisa ‘COVID-19’ është një virus i paparashikueshëm, pse mos t’i druhemi edhe prekjes së ndonjë futbollisti nga ky ‘armik’. Do të duhen analiza për të gjithë lojtarët, stafet, e të gjithë njerëzit që janë të lidhur me futbollin. Besoj se ka një mijë e një arsye që kampionati të mos rinisë dhe të stopojë në pozicionin ku është. Këtë shqetësim e kanë të gjitha skuadrat, nuk bëhet fjalë vetëm për ne. Është mirë që kampionati të ndalet këtu dhe të ndryshojë formula e Superiores. Të jenë 12 apo 14 ekipe dhe Luftëtari bashkë me Flamurtarin të mbeten pjesë e elitës”, përfundoi Hyseni.

TOMOR SHEHU – PANORAMASPORT.AL

NDIQE LIVE "PANORAMA TV"

---