FSHF kujtohet me vonesë, klubet kthehen rrugës
Një rast i rrallë në futbollin shqiptar. Nuk luhet ndeshja për shkak se mundojnë arbitrat. Kjo ndodhi jo më larg se dje në ndeshjen mes Osumit dhe Selenicës, e vlefshme për Kategorinë e Tretë.
Të dyja skuadrat ishin përgatitur për të zhvilluar ndeshjen në Kamzë, por gjatë rrugës drejt kryeqytetit, skuadrat njoftohen nga Federata Shqiptare e Futbollit se ndeshja do të shtyhet për një datë tjetër, për shkak të bojkotit të gjyqtarëve.
Stjuartët e ndeshjes kishin mbërritur në fushën ku do zhvillohej ndeshja, por ata, pasi kanë marrë njoftimin në Qendrën Stërvitore të Kamzës, janë larguar.
Ekipi i Selenicës është njoftuar kur po kalonte qytetin e Lushnjës, ndërsa Osumi ishte pranë qytetit të Kavajës. Pas njoftimit me vonesë nga Federata, ekipet janë kthyer në qytetet e tyre. Sipas informacioneve, ndeshjet e kësaj jave në Kategorinë e Tretë do të luhen pas fazës së parë, ndërsa javën e ardhshme do të luhen direkt takimet e javës së 4-t sipas kalendarit.
Në rastin e djeshëm, të dyja ekipet janë penalizuar, pasi u lajmëruan gjatë rrugës për shtyrjen e ndeshjes, ndërsa kishin bërë disa kilometra. Kategoria e Tretë ka nisur prej dy javësh dhe i zhvillon ndeshjet në Qendrën Kombëtare në Kamzë.
Abdulla Dushku
NDIQE LIVE "PANORAMA TV"