AF Luftëtari e ka mbyllur me fitore kampionatin e Kategorisë së Tretë, teksa sot në kompleksin e Kamzës është kurorëzuar kampione përmes një ceremonie modeste të organizuar nga FSHF.

Përgjegjësi i Kategorisë së Tretë, Agim Mone, i dorëzoi titullin kampion kapitenit Eldar Batha. Skuadra gjirokastrite mposhti në javën e fundit Spartakun me shifrat 4-0. Golat u shënuan nga Puci, Bellai, Gaba dhe Këndella. I pranishëm ishte edhe ish-trajneri legjendar i Luftëtarit, Hito Hitaj.

Bluzinjtë e mbyllën në vendin e parë me 27 pikë, 6 pikë më tepër se rivali më i afërt. Kësisoj, skuadra gjirokastrite e drejtuar nga Mustafa Hysi dhe Dritan Kristidhi, ngjitet automatikisht në Kategorinë e Dytë bashkë me Murlanin, që e mbylli sezonin në vendin e dytë. Ndërsa Osumi i vendit të tretë ka një shans për t’u ngjitur, pasi do të luajë një ndeshje finale me ekipin që humbet takimin “play out” të Kategorisë së Dytë.

Kujtojmë që Akademia e Futbollit Luftëtari u formua për shkak të falimentimit të klubit gjirokastrit me histori 91-vjeçare, i cili në sezonin 2019-2020 militonte në Kategorinë Superiore.

Tashmë Bashkia Gjirokastër ka marrë përsipër të investojë dhe synimi në sezonin 2021-2022 do të jetë ngjitja në Kategorinë e Parë.

PANORAMASPORT.AL

NDIQE LIVE "PANORAMA TV"

---