Partizani dhe Luftëtari kanë qenë dy klubet më të zhgënjyera gjatë ditës së sotme, pasi nuk kanë marrë rezultatet që dëshironin për ecurinë e mëtejshme të sezonit dhe objektivat që kishin.

Pas ndeshjeve, në rrjetet sociale, klubet kanë reaguar në mënyrën e tyre ndaj zhgënjimeve. Te Partizani është përdorur ironia për sa i përket momentit të penalltisë që nuk iu dha Ekuban nga gjyqtari.

“Ku shkon o Ekubano? Titulli s’është i juaji”, shkruhej në foton e postuar nga të kuqtë, sa i përket momentit më të diskutueshëm të ndeshjes.

Ndërsa te Luftëtari, pas tensionit që shpërtheu në fundin e ndeshjes kur u pësua goli barazimit nga Teuta, duket se gjithçka është qetësuar disi me humbjen e Tiranës, pasi ai rezultat do t’i japë mundësinë skuadrës gjirokastrite të qëndrojë në Superiore edhe për të paktën sezonin e ardhshëm.

Ndaj në rrjetet sociale është postuar një foto me futbollistë dhe pjesëtarë të stafit duke festuar arritjen e këtij objektivi minimal me shishe birrash, duke saktësuar se 180 minutat e ardhshëm tani kishin si qëllim vetëm sigurimin e Europës.

“Pas shumë aventurash ngjitje dhe zbritje nga kategoria, Luftëtari sot siguroi mbijetesën dhe në matematikë!! EUROPA LEAGUE ËSHTË OBJEKTIVI JONË NË KËTO NDESHJE JANË VETËM 180 MIN!!”, shkruhej në postimin e klubit gjirokastrit.

NDIQE LIVE "PANORAMA TV"

---