Fitoi gjithçka me ta si lojtar, Dinamo shpreh dhimbjen për vdekjen e Shyqyri Rrelit
Dinamo shprehu dhimbjen për ndarjen nga jeta të njërit prej personaliteteve më të mëdha të futbollit shqiptar Shyqyri Rreli.
“Blutë” vlerësuan karrierën dhe kontributin e pazëvendësueshëm të ish-futbollistit dinamovit dhe ish-teknikut të Shqipërisë dhe Tiranës. I ndjeri Rreli arriti sukseset më të mëdha si lojtar me ekipin dinamovit duke fituar 4 tituj kampionë në vitet ’50-’60.
Klube, ish-futbollistë, trajnerë ngushëlluan familjen e Shyqyri Rrelit për ndarjen nga jeta ditën e sotme.
Mesazhi i Dinamos për vdekjen e Shyqyri Rrelit:
Ditën e sotme, në moshën 89-vjeçare u nda nga jeta një prej legjendave të futbollit shqiptar dhe dinamovit, Prof. Shyqyri Rreli.
Në karrierën e tij, ai luajti për Erzenin e Shijakut, Tiranën si dhe Dinamon që e përfaqësoi në pjesën më të madhe të karrierës, vitet 1953-1962.
Prof. Rreli pati edhe një karrierë të suksesshme si trajner, ku në sy bien triumfet me Kombëtaret e moshave, duke fituar edhe dy kupa ballkanike. Ai është dekoruar edhe me çmimin “Mjeshtër i Madh” dhe “Nder i Kombit” nga dy ish-presidentët Moisiu e Topi.
FK Dinamo i shpreh ngushëllimet më të sinqerta familjarëve dhe gjithë komunitetit sportiv për këtë humbje të madhe!
PANORAMASPORT.AL
