“Erë e re” te Korabi, Bashkia e Dibrës ofron për klubin një… rezidencë
Te Korabi nis një “erë e re”. Pas shumë vitesh duket se do të ketë bashkëpunim të rëndë- sishëm mes klubit dhe Bashkisë së Dibrës, e cila ka nisur të jetë më shumë e interesuar për skuadrën. Dje është nënshkruar një marrëveshje mes Bashkisë dhe Klubit për një rezidencë të re akomodimi për skuadrën gjatë javës apo edhe përpara takimeve zyrtare.
MARRËVESHJA
“Sot (dje) u zhvillua një takim me rëndësi për ekipin e Korabit ku u nënshkrua edhe marrëveshja mes Bashkisë dhe klubit të futbollit për një rezidencë akomodimi të ekipit. Në takim mori pjesë kryetari i Bashkisë Dibër, Muharrem Rama, sekretari i Përgjithshëm i Bashkisë, Xhelil Paci, drejtori i Emergjencave, Hazbi Kamberi, drejtori i Korabit, Fehmi Mëziu dhe Shpëtim Toska, të cilët gjithashtu vizituan nga afër stadiumin dhe ambientet e akomodimit për ekipin.
Gjithashtu, u diskutua mbi problemet dhe vështirësitë që shqetësojnë mbarëvajtjen e futbollit dibran. Kryetari i Bashkisë së bashku me vartësit e tij garantuan mbështetje maksimale për një ekip model që të përfaqësojë denjësisht fanellën e ekipit të futbollit dibran. Klubi i futbollit Korabi shpreh vlerësimet për stafin e Bashkisë, në veçanti kryetarin, Muharrem Rama për ndihmën e dhënë dhe garancinë që premtoi për të ardhmen”, bëhet e ditur në reagimin e klubit dibran pas marrëveshjes së djeshme.
Korabi ia doli të mbijetonte në Kategorinë e Parë pas fitores 1-0 që arriti në javën e fundit në Pukë. Një sfidë dramatike ku dibranët i shpëtuan “play-out”-it vetëm në sekondat e fundit, pasi shënuan me një kundërsulm të shpejtë.
Fatmir Zhuzhi
NDIQE LIVE "PANORAMA TV"