“Energjia e Duros do na ndihmojë”, kryebashkiakja Sefa: Nisim një cikël të ri te Lushnja
Eriselda Sefa i ka idetë të qarta për Lushnjën. Pak minuta pasi arriti akordin me Klodian Duron, kryebashkiakja foli për “Panorama Sport”.
Konfirmoi zgjedhjen e bërë për stolin, duke paralajmëruar se për futbollin verdhejeshil nis një cikël i ri. Gjatë intervistës së dhënë, e para e bashkisë shpalli edhe objektivat. Qartazi do të kërkohet ngjitja dhe presidentja beson se energjia e trajnerit të ri do t’i çojë drejt suksesit.
Klodian Duro është trajneri i ri i Lushnjës. Pse pikërisht ai?
Konfirmoj se kemi arritur akordin me ish-futbollistin e Kombëtares sonë. Klodian Duro do të jetë trajneri i ri i Lushnjës, i skuadrës sonë të zemrës. Duam të hapim një cikël të ri te Lushnja me besimin e plotë se tekniku do t’i japë ekipit të gjithë eksperiencën dhe energjinë e tij.
Cili është objektivi që i keni vendosur për sezonin 2022- 2023?
Do të futemi në sezonin e ri me objektiva të mëdhenj, për të qenë pretendentë, për t’u rikthyer aty ku ne e meritojmë. Aty ku tifozët tanë fantastikë e duan Lushnjën, në Superiore. Ndaj, do ta mbështesim trajnerin për kërkesat në merkato.
Kontrata me trajnerin do të jetë 1-vjeçare apo…?
Përtej objektivit afatshkurtër, mbi bazën e të cilit është gjetur dakordësia me trajnerin Duro, synimi ynë madhor është ristrukturimi i të gjithë klubit, për të ndërtuar një bazë të shëndoshë për të ardhmen. Nga moshat deri tek ekipi i parë. Ndaj, duke pasur këta objektiva, shpresojmë që bashkëpunimi me teknikun Duro të shkojë përtej marrëveshjes kontraktuale.
A keni ndonjë mesazh për ish-trajnerin Agim Canaj?
E falënderoj teknikun Agim canaj për profesionalizmin dhe kontributin e tij te Lushnja, për sezonin që lamë pas, duke i uruar çdo të mirë.
ALBAN ALUSHI – PANORAMASPORT.AL
NDIQE LIVE "PANORAMA TV"