Në stadiumin “Bruno Benelli” të Ravenës, në orën 15:00, nën transmetimin e “Rai Sport 1”, kuqezinjtë e drejtuar nga Xhemal Mustedanagiç do të zhvillojnë sfidën e parë kualifikuese për Europianin U-17. Një ndeshje sa e rëndësishme, aq edhe e vështirë për kuqezinjtë, pasi përballë do të kenë një përfaqësuese që vjen nga një shkollë e rëndësishme futbolli.

Megjithatë, elementet e rritur në akademitë e ndryshme të ekipeve europiane si dhe eksperienca e një trajneri si Mustedanagiç janë një garanci për rezultate pozitive të kësaj skuadre.

Në kampin italian kjo ndeshje nuk pritet aspak si e lehtë. Vetë trajneri i ekipit “axurr”, në faqen zyrtare të Federatës Italiane të Futbollit, është shprehur se e pret një ndeshje delikate. “Është një nga ndeshjet më të rëndësishme për ne. Do të luajmë një takim që mund të thuhet se është si një derbi.

Ata kanë disa lojtarë që janë pjesë e akademive të ekipeve italiane, ndërkohë që edhe ne në skuadër kemi dy djem që kanë origjinën nga Shqipëria. I shoh lojtarët që kanë frymën e duhur dhe që janë të gatshëm për të zhvilluar me dinjitet një kompeticion të tillë”, ka deklaruar trajneri i Kombëtares U-17 të Italisë, Emiliano Bigica.

NDIQE LIVE "PANORAMA TV"

---