Ish-lojtari i Partizanit, Kaleb Ekuban, tashmë mund të cilësohet si sulmuesi kryesor i skuadrës së Lids. Futbollisti ka luajtur sot titullar në fitoren 2-0 ndaj Sandërlendit, ku nuk gjeti rrugën e rrjetës por ku protagonist ishte Ezgjan Alioski me një asist te goli i parë.

“Gradimi” i Ekuban ka ardhur si pasojë e vendimit të klubit për të shituar sulmuesin kryesor, Kris Ud. 25-vjeçari nga Zelanda e Re, i cili në sezonin e kaluar shënoi 27 gola në 44 ndeshje me Lids, po bën hapin e madh të karrierës, për t’u transferuar te Bërnli në Premier Ligë.

Lids do të përfitojë 17 milionë euro nga shitja e futbollistit që bleu dy vite më parë për 3,6 milionë euro nga Leisteri dhe të njëjtën strategji shpreson që të zbatojë edhe me Ekuban. Që në fillim, kur u afrua në skuadër, sulmuesit iu premtua një rol protagonisti, pasi në klub ishin të ndërgjegjshëm se Ud nuk do të qëndronte në Championship në këtë sezon.

NDIQE LIVE "PANORAMA TV"

---