EKSKLUZIVE/ Takaj: Kampionatit i mungon lokomotiva, ja vendi ku mund ta shesim Bregun (E PLOTË)

Panorama Sport | Lajmet e fundit nga bota e sportit

Postuar: Shkurt 25, 2020 | 0:23


EKSKLUZIVE/ Takaj: Kampionatit i mungon lokomotiva, ja vendi ku mund ta shesim Bregun (E PLOTË)

Fitorja dramatike ndaj Teutës konfirmoi se Skënderbeu ka ruajtur ende filozofinë e kohëve të arta. Ky trepikësh i marrë ka kënaqur pa fund edhe Ardjan Takajn, i cili në një intervistë të dhënë enkas për “Panorama Sport” paralajmëron se skuadrën e tij duhet ta llogarisin për pjesën e sipërme të klasifikimit. Presidenti qartëson çështjen “Bregu” dhe komenton edhe kampionatin, ndërsa hapur e thotë se futbollit shqiptar i mungon “lokomotiva”.

takaj

Sa e rëndësishme ishte për Skënderbeun kjo fitore, ndonëse dramatike?

Po ashtu siç shkoi ndeshja, ishte një fitore dramatike dhe e bukur. Na duhej ky trepikësh, pasi kemi gjithë këto javë që po luajmë mirë dhe nuk po marrim dot rezultat. Është një fitore që na fut në grupin e ekipeve që pretendojnë për lart në këtë sezon.

Çfarë keni menduar pas ndeshjeve me Bylisin dhe Tiranën? 

Asgjë. Kam qenë i qetë, pasi më ka pëlqyer loja. Kur ekipi tregon lojë të mirë, siç kemi bërë në këto ndeshje, pritshmëritë dhe besimi është më i madh. Mungesa e pikëve të plota në këto takime ka qenë punë fati. Nuk deshi që ne të merrnim maksimumin, ndonëse meritonim më shumë për aq sa dhamë në fushë. Është e rëndësishme që të ruajmë këtë ritëm që është nisur.

takaj

Skënderbeu i 2020-ës, a ju duket më i bukur në lojë se ai i 2019-ës?

Nuk diskutohet, grupi është përshtatur dhe po përgjigjen më së miri në fushë. Normalisht jemi më të fortë. Kemi qenë të fortë dhe do të vazhdojmë të jemi të tillë pavarësisht gjithçkaje.

A ka ruajtur diçka nga filozofia e lojës së kohëve të arta ky Skënderbeu? 

Kjo është një vazhdimësi. Ka shumë vite që ne po punojmë për filozofinë e lojës dhe vazhdojmë ta bëjmë këtë gjë. Kemi identitet dhe e ruajmë, pavarësisht ndryshimeve.

 Ju pamë më të qeshur dhe të qetë pas kësaj fitoreje… 

Më ka bërë 2020-ta të jem kështu, pasi loja e ekipit ka ardhur në rritje dhe kemi treguar se jemi të aftë të pretendojmë për lart. Duhet të kishim pikë më shumë por që shpresojmë të rritemi akoma me pikë në klasifikim.

Ky vit pritet që të sjellë edhe një lajm të fundit nga UEFA. Çfarë pritshmërish keni? 

Lajmin e presim të gjithë, pasi është shumë i rëndësishëm për ne, për Skënderbeun dhe për të gjithë futbollin shqiptar. E them këtë pasi nëse nuk do të vijë ai lajm, ne do të jemi në këto pozicione edhe për shumë vite.

Rikthehet edhe një herë pyetja, sa ka humbur futbolli shqiptar nga ai dënim që i është dhënë Skënderbeut? 

Futbolli ynë ka humbur shumë, është një goditje shumë e madhe. Skënderbeu ishte “lokomotiva” e kampionatit tonë dhe krijonte standarde për futbollin shqiptar. Ishte një ekip që tregonte vlera edhe në Europë. Ishim konkurrentë të fortë edhe në Europë dhe normalisht kur goditet ai nivel, jep pasoja edhe në nivelet e tjera. Po ta shikoni edhe në këto sezone kampionati kur ka kaluar edhe javën e 23-të nuk dihet ende se cili do të dalë kampion dhe cili është ekipi që e kërkon titullin. ardjan takaj

Kjo vjen, sepse mungon Skënderbeu?

Sigurisht që mungon Skënderbeu. Çdo kampionat në Europë dhe në botë ka një ekip që prin, që bën lokomotivën dhe tërheq me vete të gjithë kampionatin. Një ekip që vendos modele. Modele të cilat i ndjekin ekipet e tjera që përpiqen ta ulin nga froni.

Besoni te ky grup?

Normalisht që po, me rikthimet e Jashanicës, Ndekit apo Krasniqit grupi do të jetë më i plotë dhe shumë herë më i fortë.

Një pikë larg “play out”-it dhe gjashtë nga Europa. Ju shqetëson presioni që vjen nga poshtë? 

Ne do të jemi te vendet e sipërme të klasifikimit. Kjo është pak, por e sigurt. Nëse ju shkon mendja që Skënderbeu mendon për “play out”, atëherë gaboheni. Nuk e përfillim presionin që vjen nga poshtë. Ju e shikoni që ne jemi të barabartë me të fortët e kampionatit. Ky është morali i Skënderbeut pavarësisht gjithçkaje. Lojtarët tashmë janë bërë më të ndërgjegjshëm se ku janë dhe për çfarë pozicioni duhet të luftojnë.

Ekipi i ri i Bregut? 

Për atë jemi duke punuar dhe shumë shpejt do të keni diçka konkrete. Do të jetë një ekip i vendeve nordike.

LLAZI SARO




Për t’u bërë pjesë e grupit të "Panorama Sport" mjafton të klikoni: Join Group dhe kërkesa do t’ju aprovohet.
KOMUNITETI PANORAMA SPORT: https://www.facebook.com/groups/sportionline/

www.minuta90.com