Skandal në kohën e koronavirusit në Vlorë, lojtarët e ekipit të Kategorisë së Tretë, Labëria, zaptojnë fushën ku stërvitet Flamurtari në Pyllin e Sodës. E ndërsa aktivitetet sportive dhe grumbullimet masive janë ndërprerë për shkak të situatës kritike, ekipi i futbollit “Labëria” që militon në Kategorinë e Tretë nuk ka ngurruar që të stërvitet normalisht a thua sikur në vend çdo gjë është kthyer në normalitet.

“Panorama Sport” zbulon ekskluzivisht se ka qenë policia e Vlorës që ka konstatuar gjithçka dhe ka kontaktuar menjëherë drejtuesit e Flamurtarit. “Keni ndonjë aktivitet sportiv sot? Nuk lejohet, besoj e dini. Këtu te fusha në Pyllin e Sodës po luhet futboll”. Ky ishte komunikimi telefonik që një zyrtar i lartë i policisë së Vlorës, realizoi me të evidentuar situatën me një nga drejtuesit e klubit.

Ky i fundit është habitur dhe i ka thënë drejtuesit të policisë se Flamurtari është i shpërndarë dhe klubi po respekton rregullat dhe urdhrat e dhëna nga autoritetet shtetërore. Gazeta ka arritur të sigurojë foto nga stërvitja e ekipit të Kategorisë së Tretë pasditen e sotme. Forcat e policisë kanë ndërhyrë për të shpërndarë lojtarët. Pas këtij lajmi, “Panorama Sport” kontaktoi me drejtues të Flamurtarit. Ata janë shfaqur tejet të habitur me çfarë ndodhi.

Momenti kur sot pasdite stërviteshin në Pyllin e Sodës

“Na kontaktoi policia dhe na pyeti nëse kishim ndonjë aktivitet sot. I thamë jo. Ajo që ka ndodhur është skandaloze për situatën që ndodhemi dhe ku rreziku i infektimit me Covid-19 është i lartë. Dera e fushës ka qenë e mbyllur. Ata kanë hyrë nga gardhi duke e dëmtuar atë. Për këtë që ka ndodhur do të bëjmë menjëherë denoncim në polici”, i tha gazetës një nga zyrtarët e lartë të klubit.

ERMAL SIKA-PANORAMASPORT.AL

NDIQE LIVE "PANORAMA TV"

---