Partizani zhvilloi një minifazë përgatitore në Ohër, për të qenë në formë para dy ndeshjeve të Europa Ligës ndaj Mariborit. Gjatë grumbullimit, trajneri Skënder Gega zgjidhi edhe çështjen e kapitenit, pozicion që kishte mbetur pezull pas largimit të Idriz Bathës. Gega u kërkoi lojtarëve që të votonin për kapitenin dhe portieri Alban Hoxha arriti të zgjidhej me shumicë votash, duke marrë konsensusin e të gjithë ekipit. Por, nëse në këtë rast ka pasur konsensus, Gega u ka kërkuar futbollistëve edhe diçka tjetër.

Burime të “Panorama Sport” pranë klubit të kuq kanë bërë me dije se trajneri i ka dhënë çdo lojtari një letër të bardhë, duke i kërkuar që të skicojë formacionin ideal të Partizanit dhe lojtarët për çdo rol. Në një situatë të tillë, futbollistët kanë mbetur pak ngushtë, pasi u duhej të vendosnin për veten e tyre, por edhe shokët e skuadrës, megjithatë e kanë plotësuar edhe këtë kërkesë të trajnerit dhe kanë vendosur për formacionin.

Por, për çudinë e të gjithëve, lojtarët që ishin vendosur më shumë herë në formacionet që vetë futbollistët kishin bërë në pozicionet se si e shikonin ata veten, ose shokët e skuadrës, kanë qenë në fushë në ndeshjen e parë ndaj Mariborit. Trajneri ka marrë për bazë idetë e ekipit dhe e ka hedhur në fushë pa asnjë dyshim këtë formacion. Të kuqtë bënë një paraqitje të mirë dhe humbën me rezultat minimal.

Ajo që ra në sy në ndeshjen e parë ishte mungesa e Bardhit në formacionin titullar, që mesa duket nuk është preferuar në masë nga shokët e skuadrës. Por, ndryshe nga ndeshja e parë, në takimin që do të luhet nesër trajneri i të kuqve ka vendosur që të bëjë disa ndryshime në 11-shen bazë, i detyruar edhe nga mungesa e Belicës.

ARMAND HALILI

NDIQE LIVE "PANORAMA TV"

---