Jurgen Peqini transferohet në Kosovë, trajneri i Besës: Presidenti ka në dorë merkaton

Panorama Sport | Lajmet e fundit nga sporti

Postuar: Qershor 9, 2021 | 16:28

Jurgen Peqini transferohet në Kosovë, trajneri i Besës: Presidenti ka në dorë merkaton

 Pak ditë pasi shpalli “divorcin” me Besën, sulmuesi Jurgen Peqini transferohet në Kosovë. Ai do ta vijojë karrierën te Llapi, me të cilët ka firmosur kontratë 3- vjeçare.

kashami

Te kavajasit nuk mund të flitet ende për afrime, ndonëse negociatat vazhdojnë. Është Ndriçim Kashami ai që zbardh planet e merkatos dhe rrëfen se është ekskluzivitet i presidentit.

Në një deklaratë të dhënë për “Panorama Sport”, trajneri thotë: “Lidhur me merkaton, mund t’ju them se stafi teknik përcakton rolet ku ekipi ka nevojë për përforcime. Më tej, meqenëse është presidenti ai që paguan për afrimet, mbetet e drejta e tij të bisedojë me futbollistët e të bëjë të mundur firmosjen e kontratave. Për mua, rëndësi themelore merr kompletimi i infrastrukturës. Përse mendoj kështu? Po shiheni efektin që ka dhënë shfrytëzimi i aneksit stërvitor. Falë tij ekipi stërvitet edhe në dimër në kushte komode dhe falë ndriçimit evitohen stërvitjet në pikun e nxehtë të verës. Produkti real i kësaj mbeten prurjet jo vetëm në numër, por edhe sa i takon cilësisë nga moshat.

Mjafton t’i citoj 3 portierët: Dobjani, Dajsinani te Skënderbeu dhe Pujën tek Egnatia, më herët Lushkja, Deliu, Cara e të tjerë futbollistë. Nëse më lart citova dobinë që solli shfrytëzimi i aneksit stërvitor, finalja mbetet ndeshja, ajo e cila të shpërblen djersën. Në këtë kuptim, është e pafalshme që me gjithë premtimet e herëpashershme ende nuk kanë nisur punimet në ndërtimin e stadiumit ‘Besa’. Vështirë të ngjitesh në Superiore sado grup të mirë lojtarësh të kesh nëse sot luan në Lushnjë, nesër në Peqin e pasnesër në PezëHelmës. Si trajner, por mbi të gjitha si kavajas, apeli im shkon për Bashkinë Kavajë, KS Besën e FSHF-në, që sa më parë të nisin punimet për stadiumin. Qoftë dalja edhe kampion Superioreje nuk të shijon teksa nuk kënaq e argëton tifozët e qytetit tënd”, e mbylli Kashami.

FERIZ FERIZAJ-PANORAMASPORT.AL

NDIQE LIVE "PANORAMA TV"