E zbulon kryetari i bashkisë, sulmuesi i Kombëtares anuloi dasmën për të firmosur në Itali
Sulmuesi i Kombëtares, Azdren Llullaku u transferua disa ditë më parë të skuadra e Virtus Entelës në Serinë B duke hequr dorë përfundimisht nga kampionati kazakistanës, ku më parë ishte aktivizuar me Astanën, Tobolin dhe së fundmi ishte shumë pranë marrëveshjes me Ordabasin.
Për t’u transferuar te Entele, Llullaku ka bërë një sakrificë të madhe duke anuluar ceremoninë e dasmës me partneren e tij Roksanën. Kjo gjë është zbuluar nga kryetari i bashkisë së Tarzos në Itali, qytezë ku sulmuesi jetoi shumë vite si emigrant. Në një prononcim për mediat vendase, Vinçento Saket nuk ngurroi t’i thurte elozhe shqiptarit duke u shprehur:
“Llullaku u largua nga lufta bashkë me mamanë dhe vëllain e tij. Janë sjellë gjithmonë mirë dhe të gjithë i deshën shumë që në ditën e tyre të parë këtu në Tarzo. Unë e ndjek Azdrenin fillimisht si i apasionuar i futbollit, më shumë sesa si një kryetar bashkie.
Nuk e kanë të gjithë në qytezën e tyre një djalë i cili luan në Kombëtare dhe prej pak kohësh u kthye në Itali për të luajtur në një skuadër të Serisë B.
Ai është një djalë i thjeshtë, i cili ka vuajtur dhe e njeh mirë fjalën sakrificë. Unë do të kisha celebruar dasmën e tij në javën e kaluar, por ai shtyu gjithçka për shkak të nënshkrimit të kontratës së re”, shpjegoi kryebashkiaku.
NDIQE LIVE "PANORAMA TV"