Elbasani nuk ka dalë ende mbi tokë. Pas më shumë se dy muajsh në qetësi të plotë, ku pothuajse nuk kishte lëvizur asgjë, duket sikur këto ditët e fundit situata do të ndryshojë për mirë.

Burime të “Panorama Sport” pranë klubit verdheblu pohojnë se janë ditë vendimtare sa i përket të ardhmes, si në lidhje me gjyqin me palën angleze, që për momentin është në sirtarët e Gjykatës së Elbasanit, ashtu edhe për afrimin e donatorëve të tjerë që mund të blejnë një pjesë të aksioneve.

Edhe pse burimet janë tepër të rezervuara për të dhënë detaje rreth këtyre zhvillimeve, e rëndësishme për momentin është që gjërat duket sikur më në fund po lëvizin. Sigurisht, për aq kohë sa nuk do të shihen lëvizje konkrete, në Elbasan pjesa më e madhe do të vijojnë të jenë skeptikë për të ardhmen, pasi u bënë vite që janë mësuar me këtë situatë. Gjithsesi, një përgjigje ndoshta përfundimtare për skuadrën që do të formohet për edicionin e ri, do ta shohim në ditët e fundit të muajit korrik.

Vladimir Mema

NDIQE LIVE "PANORAMA TV"

---