Futbolli lushnjar ka një rënie të theksuar të rezultatit sportiv në 15 vitet e fundit. Gjatë kësaj periudhe nuk ka bërë dy sezone bashkë në Superiore, numëron vetëm tri pjesëmarrje në elitë dhe plot 12 kampionate në Kategorinë e Parë.

Shifrat më të dobëta që nga viti 1960, kur Lushnja kaloi për herë të parë në futbollin elitar. Lushnja ka njohur periudha të gjata në elitë, si në vitet ’61-’79, ’82-’88, ’90- ’94 dhe ’96-2006, por që pas këtij viti rënia ka qenë e dukshme, e theksuar dhe tronditëse. Edhe sezoni i fundit në Superiore ka qenë më i dobëti për skuadrën e Lushnjës, që u rendit e fundit, me një diferencë të madhe nga skuadrat e tjera.

Tashmë verdhejeshilët përgatiten për sezonin e tretë radhazi në Kategorinë e Parë, pas dy tentativave të pasuksesshme për rikthimin në elitë. Edhe në aktivitetin tjetër, atë të Kupës së Shqipërisë, rënia e rezultatit sportiv është shumë e madhe. Vetëm një çerekfinale në 15 edicionet e fundit, që i përket sezonit 2013-2014, kur skuadra lushnjare luante në Superiore dhe drejtohej nga Artan Bano. Vitet e tjera nuk ka kaluar më shumë se turi i parë dhe kjo është shumë pak, po të mendojmë se Lushnja është tri herë finaliste e Kupës, konkretisht në vitet 1978, 1998 dhe 2000.

Alban Alushi

NDIQE LIVE "PANORAMA TV"

---