Klubi durrsak është prekur nga vendimet e djeshme të Komisionit të Disiplinës, ku dy lojtarë të Teutës, Fabjan Beqja dhe Amer Duka, janë dënuar me nga 5 ndeshje, për shkak të sherrit që ndodhi të mërkurën në takimin ndaj Partizanit. 

Në një prononcim për “Panorama Sport”, drejtori i përgjithshëm i Teutës, Artan Shyti, e quan të drejtë ndëshkimin, por shpreson që me apelimin mund të zbutet masa. Gjithsesi, ai e quan këtë rast si shembull nga ku duhet nxjerrë mësim për të ardhmen, kryesisht për lojtarët e stolit, që hynë në fushë dhe u përfshinë në sherr. Pyetjes se a ishte i drejtë dënimi për dy lojtarët e Teutës, Shyti u shpreh:

“Në bazë të asaj që ndodhi në fushë, mendoj se vendimi ishte i drejtë. Duhet thënë që kjo situatë u krijua sepse lojtari i Partizanit nuk nxori topin në fundore dhe si pasoj u krijua edhe ai moment i pakëndshëm. Por, si veprim është i dënueshëm”. Në ditët në vijim, durrsakët do të vendosin edhe për apelimin e vendimit, me shpresën e reduktimit të masës së pezullimit. Apelimi? Tani që po flasim, nuk di të them gjë, do ta apelojmë apo jo.

Besoj se në ditët në vazhdim do merremi me këtë pjesë dhe mendoj se dënimi duhet të ulet. Lojtarët e stolit nuk duhet të reagonin në të tilla situata. Duhet të bëhet mësim për të ardhmen”, u shpreh drejtori Shyti për “Panorama Sport.

ZAMIR QYPI – PANORAMASPORT.AL

NDIQE LIVE "PANORAMA TV"

---