Nis sot java që pritet të sjellë zhvillime të shumta në kampin e Kastriotit. Pritet takimi final mes presidentit Vogli dhe trajnerit Ndreu, ku gjasat janë të kemi zyrtarizimin e teknikut 51-vjeçar.

Më pas do të caktohet data e fillimit të përgatitjeve dhe lëvizjet që do të bëhen në skuadër, në dalje dhe në hyrje. Aktualisht, nga Kastrioti ka vetëm largime lojtarësh që u ka përfunduar kontrata apo huazimi. Me zyrtarizimin e trajnerit, do të nisin afrimet e para, që pritet të jenë cilësore, duke qenë se objektivi është rikthimi në Superiore.

INFRASTRUKTURA – Nëse para disa vitesh FIFA e cilësonte si vend ideal për të luajtur futboll, sot stadiumi “Kastrioti” është katandisur si mos më keq. Projekti i rikonstruksionit u premtua prej më shumë se një viti, kur Kastrioti u ngjit në Superiore, por ende asgjë.

Deri tani nuk është vënë dorë në këtë stadium dhe gjasat janë që të jetë në këtë gjendje edhe për disa kohë, derisa FSHF-ja dhe Bashkia e Krujës të gjejnë gjuhën e përbashkët për nisjen e punimeve të projektit që parashikon një stadium bashkëkohor. “Panorama Sport” u interesua pranë Bashkisë Krujë për të disatën herë, por askush nuk jep shpjegime për stadiumin, që ditaditës po degradon. Gjendja aktuale e stadiumit e detyron Kastriotin të “migrojë” në “Redi Maloku”, ku gjeti “strehë” sezonin e shkuar.

Bujar Balliu

NDIQE LIVE "PANORAMA TV"

---