Çuditë e futbollit shqiptar / Miqësorja Skënderbeu-Pogradeci, aty ku protagoniste u bënë… fanellat (FOTO)
Ndeshja e sotme mes Skënderbeut dhe Pogradecit në stadiumin e qytetit të Korçës, u ka shërbyer të dy skuadrave për të monitoruar formën e lojtarëve kur mbetet një muaj nga fillimi i kampionatit. Por ajo që do të kujtohet më shumë nga barazimi 0-0 është situata e çuditshme që u krijua me fanellat gjatë sfidës.
Dy skuadra me sa duket nuk ishin koordinuar përpara sfidës rreth uniformave sportive që do të përdornin në këtë sfidë dhe si për çudi, të dy palët zbritën në fushën e lojës me fanellat e bardha.
Kjo shkaktoi pak konfuzion para startit të ndeshjes pasi ishte e qartë se do të bëhej e pamundur të identifikoheshin futbollistët e dy ekipeve gjatë takimit.
Zgjidhja momentale u bë nga Skënderbeu, pasi lojtarët e ekipit vendas veshën të gjithë jelekët e stërvitjes mbi fanellat, duke u bërë kështu të dallueshëm nga kundërshtarët pogradecarë.
Sigurisht, kjo nuk ishte një zgjidhje optimale, ndaj në pushimin e ndeshjes korçarët ndryshuan përsëri.
Në pjesën e dytë të takimit, skuadra vendase luajti me fanellat stërvitore me ngjyrë të kuqe, duke i dhënë fund kësisoj ngatërresës së pazakontë me ekipin e Pogradecit.
PANORAMASPORT.AL
NDIQE LIVE "PANORAMA TV"